തിരുവനന്തപുരം : ശബരിമല സ്വര്ണക്കൊള്ളക്കേസില് കൂടുതല് വ്യക്തത വരുത്താന് ഉണ്ണികൃഷ്ണന് പോറ്റിയെയും സുധീഷ് കുമാറിനെയും പ്രത്യേക അന്വേഷണസംഘം ജയിലില് ചോദ്യം ചെയ്തു.അന്താരാഷ്ട്ര വിഗ്രഹ കടത്തിലടക്കം സംശയദൃഷ്ടിയിലുളള ഡി മണി എന്ന പുതിയ പേര് കൂടി അന്വേഷണസംഘത്തിന്റെ മുന്നിലെത്തിയ പശ്ചാത്തലത്തില് കൂടിയാണ് ഇത്.
തമിഴ്നാട് ദിണ്ടിഗല് സ്വദേശി ബാലമുരുകനെന്ന ഡി മണിയെ ചെന്നൈയില് നിന്നാണ് പ്രത്യേക അന്വേഷണസംഘം കണ്ടെത്തിയത്.ആഭരണ വ്യാപാരിയാണ് ഇയാള്. മണിയെ കേന്ദ്രീകരിച്ചാണ് അന്വേഷണം മുന്നോട്ട് പോകുന്നത്.
ശബരിമലയില് നിന്ന് സ്വര്ണത്തിന് പുറമെ പഞ്ചലോഹ വിഗ്രഹങ്ങളും കടത്തിയെന്നും ഇതിന് പിന്നില് വിഗ്രഹ കടത്ത് സംഘ തലവന് മണി എന്നായിരുന്നു വിദേശ വ്യവസായിയുടെ മൊഴി.
ശബരിമല സ്വര്ണക്കൊള്ള കാലത്ത് ഡി മണി തിരുവനന്തപുരത്തെത്തി ശബരിമലയിലെ ഉന്നതരുമായി ചില ഇടപാടുകള് നടത്തിയെന്നാണ് വിദേശ വ്യവസായി മൊഴി നല്കിയത്. 2020 ഒക്ടോബര് 20ന് പണം കൈമാറ്റം നടന്നുവെന്നും പറഞ്ഞു. ശബരിമലയിലെ ഉന്നതനും ഉണ്ണികൃഷ്ണന് പോറ്റിയും ഡി മണിയും മാത്രമാണ് പണം കൈമാറ്റത്തില് പങ്കെടുത്തതെന്ന് വിദേശ വ്യവസായിയുടെ മൊഴിയിലുണ്ട്.
