കൊച്ചി: അന്താരാഷ്ട്ര മുരുകഭക്ത സംഗമം 28ന് എറണാകുളത്തപ്പന്‍ ശിവക്ഷേത്ര ഹാളില്‍. രാവിലെ ആറിന് മഹാഗണപതി ഹോമത്തോടുകൂടി ആരംഭിക്കുന്ന ചടങ്ങുകളില്‍ 18 സിദ്ധന്മാരെ സങ്കല്‍പ്പിച്ചുകൊണ്ട് സര്‍വരോഗ നിവാരണത്തിനായി അഷ്ടാദശ സിദ്ധപൂജ. തുടര്‍ന്ന് മഹാസ്‌കന്ദ ഹോമം എന്നിവ നടക്കും. സര്‍വൈശ്വര്യ പ്രദായകമാണ് ഈ അപൂര്‍വ ഹോമം. വിദ്യാ തടസം മാറുന്നതിനും ജ്ഞാനലബ്ധിക്കുമായി എല്ലാ അറിവിന്റെയും ഈശ്വരനായ മുരുകസ്വാമിയെ മുന്‍നിര്‍ത്തി വിദ്യാമന്ത്രാര്‍ച്ചന.
ചടങ്ങില്‍ ഏറ്റവും പ്രാധാന്യമുള്ളത് മഹാശക്തിവേല്‍ പൂജയാണ്. എല്ലാ പ്രതിസന്ധികളെയും തടസങ്ങളെയും അതിജീവിക്കാനും ഇല്ലാതാകുന്നതിനും വേണ്ടിയാണ് ശക്തിവേല്‍ പൂജ. ഈ പൂജയില്‍ വ്യക്തികള്‍ക്കും കുടുംബങ്ങള്‍ക്കും പുരാതന തറവാടുകള്‍ക്കും ക്ഷേത്രങ്ങള്‍ക്കും വേലുകള്‍ സമര്‍പ്പിക്കാം. ആ വേലുകളെല്ലാം മഹാ ശക്തിവേല്‍ പൂജയില്‍ സങ്കല്‍പ്പിച്ച് ദോഷങ്ങളെയും ബാധകളെയും അകറ്റി പ്രത്യേക ശക്തിയും ചൈതന്യവും അതില്‍ ആവാഹിച്ച് തിരിച്ചു നല്‍കും. അത് തിരിച്ചു കൊണ്ടു പോകാവുന്നതാണ്. കേരളത്തിലെയും തമിഴ്‌നാട്ടിലെയും പ്രമുഖ ആചര്യന്മാര്‍ ചടങ്ങുകള്‍ക്ക് നേതൃത്വം നല്‍കും. അതിനുശേഷം സാമൂഹികമായിട്ടുള്ള സ്‌കന്ദഷഷ്ഠി കവച പാരായണം നടത്തും. പിന്നീട് എറണാകുളം കെഎസ്ആര്‍ടിസി ബസ്സ്റ്റാന്‍ഡിനു സമീപമുള്ള കുമാരേശ്വര ക്ഷേത്രത്തില്‍നിന്നും വേല്‍ ഘോഷയാത്ര ആരംഭിച്ച് ശിവക്ഷേത്രത്തില്‍ സമാപിക്കും.
പ്രമുഖ അധ്യത്മിക സാംസ്‌കാരിക നായകന്മാര്‍ പങ്കെടുക്കുന്ന മുരുകഭക്ത സമ്മേളനവും നടക്കുമെന്ന് കോര്‍ഡിനേറ്റര്‍ എസ്. ജയകൃഷ്ണന്‍ അറിയിച്ചു. കൂടുതല്‍ വിവരങ്ങള്‍ക്ക് 9447811618, 8893132299.
