തിരുവനന്തപുരം: വാഹനാപകടത്തില് പരിക്കേറ്റ യുവാവിന് റോഡരികില് അടിയന്തര ശസ്ത്രക്രിയ നടത്തി ജീവന് രക്ഷിക്കാന് ശ്രമിച്ച ഡോക്ടര്മാര്ക്ക് ഗവര്ണര് രാജേന്ദ്ര വിശ്വനാഥ് ആര്ലേക്കറുടെ അഭിനന്ദനം. ഡോ. മനൂപ്, ഡോ. തോമസ് പീറ്റര് അദ്ദേഹത്തിന്റെ ഭാര്യ ഡോ. ദിദിയ എന്നിവരെ ഗവര്ണര് ഫോണില് വിളിച്ച് അഭിനന്ദിച്ചു. മൂന്ന് ഡോക്ടര്മാരും കേരളത്തിന്റെ അഭിമാനമാണെന്ന് പറഞ്ഞ ഗവര്ണര് ഔദ്യോഗിക വസതിയായ ലോക്ഭവനിലേക്ക് അവരെ ക്ഷണിച്ചു, ഡോക്ടര്മാര് നാളെ ക്രിസ്തുമസ് ദിനത്തില് ലോ
ക്ഭവനിലെത്തി ഗവര്ണറെ കാണും.
അതേസമയം ബ്ലേഡും സ്ട്രോയും ഉപയോഗിച്ചു യുവഡോക്ടര്മാര് നല്കിയ അടിയന്തര സര്ജറിക്ക് ലിബിന്റെ ജീവന് രക്ഷിക്കാനായില്ല. സ്വകാര്യ ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിച്ച കൊല്ലം പുന്നല ചാച്ചിപുന്ന ഇഞ്ചൂര് ലിനേഷ് ഭവനില് ലിനു (40) ഇന്നലെ വൈകുന്നേരത്തോടെ മരണത്തിനു കീഴടങ്ങി.
ഞായറാഴ്ച രാത്രി എട്ടിനാണ് എറണാകുളം ഉദയംപേരൂരില് അപകടത്തില്പെട്ട് പരിക്കേറ്റു റോഡില് കിടന്ന ബൈക്ക് യാത്രികനായ ലിനുവിന് സാധാരണ ബ്ലേഡും പേപ്പര് സ്ട്രോയും ഉപയോഗിച്ചു മൊബൈല് വെട്ടത്തില് ഡോക്ടര്മാര് ‘സര്ജിക്കല് ക്രിക്കോത്തൈറോട്ടമി’യെന്ന അടിയന്തര ചികിത്സ നല്കിയത്. കടവന്ത്ര ഇന്ദിരാ ഗാന്ധി കോ-ഓപ്പറേറ്റീവ് ഹോസ്പിറ്റലിലെ മെഡിക്കല് എമര്ജന്സി ഡിപ്പാര്ട്ട്മെന്റിലെ ആര്എംഒ ആയ ഡോ. തോമസ് പീറ്ററും ഡോ. ദിദിയ കെ. തോമസും കോട്ടയം മെഡിക്കല് കോളജ് ഡിപ്പാര്ട്ട്മെന്റ് ഓഫ് കാര്ഡിയോ വാസ്കുലര് തെറാപ്പിക് സര്ജറി അസിസ്റ്റന്റ് പ്രഫ. ഡോ. ബി. മനൂപും ആയിരുന്നു സര്ജറി നടത്തിയത്. രണ്ട് ബൈക്കുകള് കൂട്ടിയിടിച്ചുണ്ടായ അപകടത്തില് മൂക്കും പല്ലും തകര്ന്ന് രക്തം കട്ടപിടിച്ച് ശ്വാസനാളം അടഞ്ഞ നിലയിലായിരുന്ന ലിനു. ഗുരുതര മുറിവിനെ തുടര്ന്നു ശ്വാസമെടുക്കാന് കഴിയാതെ ‘റെസ്പിറേറ്ററി അറസ്റ്റ്’ എന്ന അവസ്ഥയിലേക്ക് നീങ്ങുകയായിരുന്നു ഈ സമയം ലിനു. ഹോസ്പിറ്റലില് എത്തിക്കുന്നതിനു സമയമേറെയെടുക്കുമെന്നതിനാലാണ് മൂന്ന് ഡോക്ടര്മാരും ചേര്ന്ന് നടുറോഡില് വെച്ച് നാലു മിനിറ്റിനുള്ളില് സര്ജറി നടത്തിയത്. അടിയന്തര ശസ്ത്രക്രിയക്ക് ശേഷം ലിനുവിനെ കൊച്ചിയിലെ സ്വകാര്യ ആശുപത്രിയിലേക്ക് മാറ്റിയിരുന്നു.
തീവ്രപരിചരണ വിഭാഗത്തില് പ്രവേശിപ്പിച്ച ലിനു ഇന്നലെ സന്ധ്യയോടെയാണ് മരണത്തിന് കിഴടങ്ങിയത്. എറണാകുളം മൗസി ഫുഡ് കമ്പനി റീജിയണല് മാനേജരായായിരുന്നു ലിനു. എറണാകുളത്തെ ജോലി സ്ഥലത്തു നിന്നും ക്രിസ്തുമസ് അവധിക്ക് പത്തനാപുരത്തെ വീട്ടിലേക്ക് ഇരുചക്ര വാഹനത്തില് വരുന്ന വഴിയില് മറ്റൊരു ഇരുചക്ര വാഹനവുമായി കൂട്ടിയിടിക്കുകയായിരുന്നു. ജിജിയാണ് ഭാര്യ. 12കാരിയായ ഏയ്ഞ്ചലും 11 കാരിയായ ആന്ഡ്രിയയും മക്കളാണ്. സംസ്കാരം ഇന്ന് ചാച്ചിപുന്ന ശാലേം മര്ത്തോമ്മാ ദേവാലയ സെമിത്തേരിയില്.
