കോളേജുകളിലെ കക്ഷി രാഷ്‌ട്രീയ വിലക്ക് : സഭയ്‌ക്കു തെറ്റുപറ്റിയെന്ന് ആര്‍ച്ച് ബിഷപ്പ് മാര്‍ ജോസഫ് പാംപ്ലാനി

കോട്ടയം: സഭയ്‌ക്ക് കീഴിലെ കോളേജുകളില്‍ കക്ഷി രാഷ്‌ട്രീയം ഒഴിവാക്കാനുള്ള ബോധപൂര്‍വ്വമായ ശ്രമങ്ങള്‍ നടന്നിട്ടുണ്ടെന്നും ഈ നിബന്ധനകള്‍ കുട്ടികള്‍ക്കിടയില്‍ അരാഷ്‌ട്രീയത വളര്‍ത്തിയെന്ന് ഞങ്ങള്‍ തിരിച്ചറിയുന്നുവെന്നും തലശേരി ആര്‍ച്ച് ബിഷപ്പ് മാര്‍ ജോസഫ് പാംപ്ലാനി. ‘നല്ലകുടുംബത്തില്‍ പിറന്നവര്‍ക്ക് പറഞ്ഞിട്ടുള്ളതല്ല രാഷ്‌ട്രീയമെന്നും, അതിലേക്ക് പഠിക്കാത്തവരും ഉഴപ്പന്‍മാരും സമരക്കാരും മാത്രം ചെല്ലുന്നതാണെന്നുമുള്ള പൊതുസമൂഹത്തിന്റെ ചിന്താധാര ഞങ്ങളും ഏറ്റെടുക്കുകയായിരുന്നു. അത് നമ്മുടെ സമൂഹത്തെ രാഷ്‌ട്രീയത്തില്‍ നിന്ന് പിന്നോട്ട് നയിച്ചുവെന്ന് പാംപ്ലാനി പറഞ്ഞു. ഒരു മാധ്യമത്തിനു നല്‍കിയ അഭിമുഖത്തിലാണ് അദ്‌ദേഹം കുറ്റസമ്മതം നടത്തിയത്.
സഭയുടെ ഈ നിലപാടു കൊണ്ടാവാം ഇത്തരത്തില്‍ അരാഷ്‌ട്രീയത നമ്മുടെ സമൂഹത്തില്‍ വളര്‍ന്നുവന്നതെന്ന് അദ്‌ദേഹം പറഞ്ഞു. രാഷ്‌ട്രീയം കൂടിയുണ്ടെങ്കിലെ പൗരബോധമുള്ള സമൂഹം ഉണ്ടാവുകയുള്ളൂവെന്ന് ഞങ്ങള്‍ തിരിച്ചറിയുന്നു. രാഷ്‌ട്രീയമെന്നത് സത്യസന്ധതയ്‌ക്ക് വിലയില്ലാത്തതാണെന്നും അവിടെ കൈക്കൂലിയും അഴിമതിയുമേ ഉള്ളൂവെന്നുമുള്ള പൊതുബോധമാണ് സഭയും ഉള്‍ക്കൊണ്ടത്. നമ്മുടെ സമുദായത്തില്‍ ക്വാളിറ്റിയുള്ള ലീഡര്‍ഷിപ്പ് ഉണ്ടാകുന്നില്ല. എല്ലാ സമുദായങ്ങളും ശ്രദ്ധിക്കേണ്ട കാര്യം, പുതിയ തലമുറയിലെ കഴിവുള്ളവരും സമര്‍പ്പണബുദ്ധിയുമുള്ളവരെ രാഷ്‌ട്രീയത്തിലേക്ക് ഓറിയന്റ് ചെയ്യണമെന്നാണ്’ അദ്‌ദേഹം വിശദീകരിച്ചു.