തിരുവനന്തപുരം:ന്യൂനപക്ഷങ്ങള്ക്ക് തല ഉയര്ത്തി ജീവിക്കാനുള്ള സാഹചര്യം ഒരുക്കാന് ഇടതുപക്ഷം പ്രതിജ്ഞാബദ്ധമാണെന്ന് മുഖ്യമന്ത്രി പിണറായി വിജയന്.വര്ഗീയ ശക്തികള്ക്കെതിരെ നെഞ്ച് വിരിച്ച നിന്ന ചരിത്രമാണ് ഇടതുപക്ഷത്തിന്റേത്.പുത്തരിക്കണ്ടം മൈതാനത്ത് സമസ്ത ശതാബ്ദി സന്ദേശ യാത്രയില് പങ്കെടുത്ത് സംസാരിക്കുകയായിരുന്നു മുഖ്യമന്ത്രി.
ന്യൂനപക്ഷങ്ങളെ ഇടതുപക്ഷം എക്കാലവും സവിശേഷതയോടെയാണ് കണ്ടത്.ഇടത് സര്ക്കാരാണ് മലപ്പുറം ജില്ലയ്ക്ക് രൂപം നല്കിയത്.ന്യൂനപക്ഷങ്ങളുടെ ആശങ്കകള് പരിഹരിക്കുന്നതിനും അവരെ ചേര്ത്തുപിടിച്ച് മുന്നോട്ട് പോകുന്നതിനും സംസ്ഥാന സര്ക്കാര് എല്ലാ ഘട്ടത്തിലും തയാറായിട്ടുണ്ടെന്ന് മുഖ്യമന്ത്രി പറഞ്ഞു.ഇനിയും തയാറാകും എന്ന ഉറപ്പ് നല്കുന്നു.
മലബാര് കലാപത്തിന് ശേഷം മുസ്ലിം പള്ളി നിര്മ്മാണത്തിന് വിലക്കുണ്ടായിരുന്നത് നീക്കിയത് ഇഎംഎസ് സര്ക്കാരാണ്.മലബാര് മേഖലയില് കൂടുതല് സ്കൂളുകള് നിര്മ്മിച്ചത് 1957 ലെ സര്ക്കാരാണ്.ന്യൂനപക്ഷങ്ങളെ എല്ലാകാലത്തും ചേര്ത്തു പിടിച്ചിട്ടുണ്ടെന്നതിന് തെളിവാണ് ഇവയൊക്കെ.ന്യൂനപക്ഷ സംരക്ഷണം തെരഞ്ഞെടുപ്പ് മുന്നില് കണ്ടല്ലെന്ന് എല്ഡിഎഫ് സര്ക്കാരിന്റെ പ്രവര്ത്തനം നോക്കിയാല് വ്യക്തമാകുമെന്ന് മുഖ്യമന്ത്രി പറഞ്ഞു.
കേരളത്തില് മതനിരപേക്ഷ സമൂഹത്തെ വളര്ത്തിയെടുക്കുന്നതില് സമസ്തയ്ക്കും വലിയ പങ്കുണ്ട്. സമൂഹത്തില് സമാധാനവും സഹവര്ത്തിത്വം നിലനിര്ത്തുന്നതിലും സമസ്ത ശ്രദ്ധ നല്കിയെന്ന് മുഖ്യമന്ത്രി പറഞ്ഞു. മുസ്ലീം സമുദായത്തിന്റെ ന്യായമായ അവകാശങ്ങള്ക്ക് വേണ്ടി പോരാടാന് സമസ്തക്ക് സാധിച്ചെന്നും അദ്ദേഹം അഭിപ്രായപ്പെട്ടു.
