കാഞ്ഞങ്ങാട്: മലബാറില് നിന്നുള്ള ഗോവ വിമോചന സമരനായകന് പറങ്കികളെ തുരത്താന് ഗോവയിലേക്ക് പട നയിച്ച മലയാളികളില് മുമ്പനായ കെ. വി. എന്ന കെ. വി. നാരായണന് സൗമ്യനായ നേതാവാണ്. ആ സമരത്തില് മലബാര് മേഖലയുടെ ജാഥാ ലീഡറായിരുന്നു കാസര്കോട് ജില്ലയിലെ പടന്നക്കാട് സ്വദേശി നാരായണന്. രാജ്യം ക്വിറ്റിന്ത്യാ ദിന സ്മരണയില് രാഷ്ട്രപതിയുടെ പ്രത്യേക അഭിനന്ദന സന്ദേശം നല്കി ആദരിച്ച സ്വാതന്ത്ര്യസമര സേനാനികളില് കാസര്കോട് ജില്ലയില് നിന്നുള്ള രണ്ടു പേരില് ഒരാളാണ് 93 വയസുള്ള ഈ ആദ്യകാല സോഷ്യലിസ്റ്റ് നേതാവ്.
ഗോവ വിമോചന സമരത്തെ കുറിച്ച് കെ. വി. നാരായണന് ഇങ്ങനെ ഓര്മിക്കുന്നു ‘1955 ആഗസ്റ്റ് 15ന് ഗോവയില് എത്താനായിരുന്നു നിര്ദേശം. സമര ജാഥയുടെ ഉദ്ഘാടനം കോഴിക്കോട് ടൗണ് ഹാളില് കേരള ഗാന്ധി കെ. കേളപ്പജിയാണ് നിര്വഹിച്ചത്. മംഗലാപുരത്ത് നിന്ന് ബല്ഗാമിലേക്ക് 30 കിലോമീറ്റര് കാല്നടയായി സഞ്ചരിച്ചു. രാജ്യത്തെ വിവിധ പ്രദേശങ്ങളില് നിന്നെത്തിയ അറുന്നൂറോളം പേര് ജാഥയില് പങ്കെടുത്തു. ഗോവയില് എത്തിയ ഞങ്ങളെ പോര്ച്ചുഗീസ് പോലീസ് അടിച്ച് പരിക്കേല്പ്പിച്ചു. വെടിവെച്ച് ഭയപ്പെടുത്തി. സമര വളണ്ടിയര്മാരെ പോലീസുകാര് അടിച്ചോടിച്ചു. പിന്നെ ഭാരത സര്ക്കാറിന്റെ പട്ടാള നടപടി പ്രഖ്യാപിച്ചു. പോര്ച്ചുഗീസുകാര് ഗോവയെ സ്വതന്ത്രമാക്കി പാലായനം ചെയ്തു.
ദേശീയ സ്വാതന്ത്ര്യസമരത്തിന്റെ ഭാഗമായി ഗോവ മോചന സമരം മാറി. കയ്യില് പൈസയില്ലാത്തതിനാല് റെയില്വേ വാറന്റ് വാങ്ങിയാണ് വളണ്ടിയര്മാര് നാട്ടിലേക്ക് വന്നത്. കോഴിക്കോട് മുതലക്കുളം മൈതാനിയില് അരങ്ങില് ശ്രീധരന്റെ നേതൃത്വത്തില് വളണ്ടിയര്മാര്ക്ക് നല്കിയ സ്വീകരണം പോര്ച്ചുഗീസ് പോലീസിന്റെ കൊടിയ മര്ദ്ദനത്തിന്റെ വേദന മറക്കാന് ഞങ്ങള്ക്ക് കരുത്തേകി. ‘ഗോവന് വിമോചന സമരത്തില് പങ്കാളിയായതിന്റെ ധീരസ്മരണകള് അയവിറക്കിയ അദ്ദേഹം ഭാരതത്തിന്റെ ഐക്യവും അഖണ്ഡതയും കണ്ണിലെ കൃഷ്ണമണി പോലെ കാത്തുസൂക്ഷിക്കേണ്ടവര് പുതുതലമുറയാണെന്ന് ഓര്മിപ്പിച്ചു.
48 വര്ഷമായി ഹൊസ്ദുര്ഗ് താലൂക്ക് ഭുപണയബാങ്ക് പ്രസിഡണ്ടാണ്. 1927 ജൂലൈ 17ന് കാഞ്ഞങ്ങാട് ലക്ഷമി നഗറിലെ കിഴക്കെവീട്ടില് പക്കീരന്റെയും നീലേശ്വരം തെരുവത്ത് ഉമ്പിച്ചിയുടേയും മകനായി ജനിച്ച കെ. വി. നാരായണന് ഹൊസ്ദുര്ഗില് ടെക്സ്റ്റൈല് മില് ജോലിക്കാരനായിരുന്നു. ഇന്ന് 4 മണിക്ക് തിരുവനന്തപുരത്ത് ലോക്ഭവനില് നടക്കുന്ന ഗോവ വിമോചന സമരനായകരെ ആദരിക്കുന്ന ചടങ്ങിലേക്ക് ഗവര്ണര് ക്ഷണിച്ചിട്ടുണ്ടെങ്കിലും ശാരീരിക അവശത കാരണം കെ. വി. നാരായണന് പങ്കെടുക്കില്ല. മകള് ആശാ പ്രദോഷ് ചടങ്ങില് പകരം പങ്കെടുക്കും.
ജന്മഭൂമി ഓണ്ലൈന്