കാന്ബെറ: സിഡ്നിയിലെ ബോണ്ടി ബീച്ചില് ആക്രമണം നടത്തിയ പ്രതികളില് ഒരാളായ സാജിദ് ഭാരതീയനെന്ന് റിപ്പോര്ട്ട്. പ്രതികള് ഫിലിപ്പീന്സ് സന്ദര്ശിച്ചത് ഭാരതീയ പാസ്പോര്ട്ട് ഉപയോഗിച്ചാണ്. സാജിദ് അക്രം ഹൈദരാബാദ് സ്വദേശിയാണെന്ന് തെലങ്കാന സര്ക്കാര് സ്ഥിരീകരിച്ചിട്ടുണ്ട്.
സാജിദ് അക്രം ഭാരതീയ പാസ്പോര്ട്ടിലും മകന് നവീദ് ഓസ്ട്രേലിയന് പാസ്പോര്ട്ടിലുമാണ് ഫിലിപ്പീന്സ് യാത്ര നടത്തിയത്. നവംബര് ഒന്നിനാണ് ഇരുവരും ഫിലിപ്പീന്സ് സന്ദര്ശിച്ചത്. നവംബര് 28നാണ് പ്രതികള് തിരിച്ചെത്തിയത്. ഇതിനെപ്പറ്റി കൂടുതല് അന്വേഷിക്കുമെന്ന് ഫിലിപ്പീന്സ് അധികൃതര് വ്യക്തമാക്കി.
പ്രതികള് ഇസ്ലാമിക് സ്റ്റേറ്റില് നിന്ന് പ്രചോദനമുള്ക്കൊണ്ടാണ് ആക്രമണം നടത്തിയതെന്ന് നേരത്തെ വ്യക്തമായിരുന്നു. അതിന്റെ തെളിവായി അക്രമികളുടെ കാറില് നിന്ന് ഐഎസ് പതാകകളും രേഖകളും കണ്ടെത്തിരുന്നു.
നവീദിന്റെ അച്ഛന് സാജിദ് അക്രം 1998ല് വിദ്യാര്ത്ഥി വിസയില് ഓസ്ട്രേലിയയിലേക്ക് കുടിയേറിയതാണെന്നും ഒന്നിലധികം തവണ ഇയാള് ഭാരതത്തിലെത്തിയതായും റിപ്പോര്ട്ടുണ്ട്. 2022ലാണ് സാജിദ് അവസാനമായി ഭാരതം സന്ദര്ശിച്ചത്.
കഴിഞ്ഞ ദിവസം ബോണ്ടി ബീച്ചിലെ ‘ഹനൂക്ക ബൈ ദ സീ’ ആഘോഷങ്ങള്ക്കിടയില് ജൂതരെ ലക്ഷ്യംവച്ചുണ്ടായ ഭീകരാക്രമണത്തില് 15 പേര് കൊല്ലപ്പെടുകയും നാല്പതോളം പേര്ക്ക് പരിക്കേല്ക്കുകയും ചെയ്തിരുന്നു.
