തിരുവനന്തപുരം:രാഹുല് മാങ്കൂട്ടത്തില് എംഎല്എയ്ക്കെതിരെ ലൈംഗിക പീഡന പരാതി നല്കിയ യുവതിക്കെതിരെ സൈബര് അധിക്ഷേപം നടത്തിയെന്ന കേസില് കെപിസിസി ജനറല് സെക്രട്ടറി സന്ദീപ് വാര്യരെ ഉടന് അറസ്റ്റ് ചെയ്യില്ലെന്ന് പ്രോസിക്യൂഷന് കോടതിയെ അറിയിച്ചു.കേസില് പൊലീസ് റിപ്പോര്ട്ട് വന്നിട്ടില്ലെന്നും റിപ്പോര്ട്ട് വരുന്നത് വരെ അറസ്റ്റ് ചെയ്യില്ലെന്നുമാണ് പ്രോസിക്യൂഷന് പറഞ്ഞത്.
സന്ദീപ് വാര്യരുടെ മുന്കൂര് ജാമ്യാപേക്ഷ ഈ മാസം 15 ന് വീണ്ടും പരിഗണിക്കും. പരാതിക്കാരിയുടെ ചിത്രമോ പേരോ സാമൂഹ്യ മാധ്യമത്തിലൂടെ പങ്കുവച്ചിട്ടില്ലെന്നും പണ്ടുണ്ടായിരുന്ന പോസ്റ്റ് മറ്റാരോ കേസിന് ശേഷം കുത്തിപൊക്കിയതാണെന്നുമാണ് മുന്കൂര് ജാമ്യ ഹര്ജിയില് സന്ദീപ് വാര്യര് പറയുന്നത്.അതിജീവിതയുടെ പരാതിയില് സന്ദീപ് വാര്യരുള്പ്പെടെ ആറ് പേര്ക്കെതിരെയാണ് സൈബര് പൊലീസ് കേസെടുത്തത്.
മഹിളാ കോണ്ഗ്രസ് പത്തനംതിട്ട ജില്ലാ സെക്രട്ടറി രഞ്ജിത പുളിക്കനാണ് ഒന്നാം പ്രതി. കോണ്ഗ്രസ് അനുകൂലിയായ അഭിഭാഷക ദീപ ജോസഫ് രണ്ടാം പ്രതിയാണ്. ദീപ ജോസഫ് എന്ന് പേരുള്ള മറ്റൊരു അക്കൗണ്ട് ഉടമയാണ് മൂന്നാം പ്രതി.സന്ദീപ് വാര്യര് നാലാം പ്രതിയും നിലവില് റിമാന്ഡിലുളള രാഹുല് ഈശ്വര് അഞ്ചാം പ്രതിയുമാണ്. പാലക്കാട് സ്വദേശി വ്ലോഗറാണ് കേസിലെ ആറാം പ്രതി.
