ന്യൂദല്ഹി: 228 കോടിയുടെ ബാങ്ക് തട്ടിപ്പ് കേസില് അനില് അംബാനിയുടെ മകന് ജയ് അന്മോല് അനില് അംബാനിക്കും റിലയന്സ് ഹോം ഫിനാന്സ് ലിമിറ്റഡിനും (ആര്എച്ച്എഫ്എല്) എതിരെ സിബിഐ ക്രിമിനല് കേസ് രജിസ്റ്റര് ചെയ്തു. യൂണിയന് ബാങ്ക് ഓഫ് ഇന്ത്യക്ക് നഷ്ടം വരുത്തിയെന്ന പരാതിയിലാണ് നടപടി.
ആര്എച്ച്എഫ്എല് കമ്പനി ഡയറക്ടര്മാരായ ജയ് അന്മോല് അനില് അംബാനി, രവീന്ദ്ര ശരദ് സുധാകര് എന്നിവര്ക്കെതിരെയാണ് പരാതി. ബിസിനസ് ആവശ്യങ്ങള്ക്കായി ബാങ്കിന്റെ മുംബൈ ശാഖയില് നിന്ന് ഏകദേശം 450 കോടിയുടെ ക്രെഡിറ്റ് പരിധി കമ്പനി നേടിയിരുന്നു. എന്നാല് കൃത്യസമയത്ത് തിരിച്ചടവ് നടത്തുക, പലിശ നല്കുക, ആവശ്യമായ രേഖകള് സമര്പ്പിക്കുക തുടങ്ങിയ ബാങ്കിന്റെ നിബന്ധനകള് കമ്പനി പാലിച്ചില്ല. ഇതോടെ 2019 സെപ്തംബര് 30ന് ഈ അക്കൗണ്ട് നിഷ്ക്രിയ ആസ്തിയായി (എന്പിഎ) പ്രഖ്യാപിച്ചു.
2016 ഏപ്രില് മുതല് 2019 ജൂണ് വരെയുള്ള കാലയളവില് അക്കൗണ്ടുകള് പരിശോധിച്ചപ്പോള് വായ്പയെടുത്ത ഫണ്ടുകള് മറ്റ് ആവശ്യങ്ങള്ക്കായി വകമാറ്റി ഉപയോഗിച്ചതായി കണ്ടെത്തി. കടം വാങ്ങിയ കമ്പനിയുടെ പ്രൊമോട്ടര്മാരും ഡയറക്ടര്മാരും എന്ന നിലയില് ഇരുവരും അക്കൗണ്ടുകളില് കൃത്രിമം കാണിച്ച് പണം വഞ്ചനാപരമായി ദുരുപയോഗം ചെയ്തുവെന്നും വായ്പ നല്കിയ ആവശ്യത്തിന് അല്ലാതെ മറ്റ് ആവശ്യങ്ങള്ക്കായി വകമാറ്റുകയും ചെയ്തതായാണ് ബാങ്ക് ആരോപിക്കുന്നത്.
ഇതിനെത്തുടര്ന്നാണ് സിബിഐ കേസ് രജിസ്റ്റര് ചെയ്തത്. വഞ്ചന, ക്രിമിനല് ഗൂഢാലോചന, സ്ഥാന ദുരുപയോഗം എന്നിവയുമായി ബന്ധപ്പെട്ട കുറ്റങ്ങള് ചുമത്തിയാണ് കേസ് എടുത്തിരിക്കുന്നത്. യൂണിയന് ബാങ്ക് ഓഫ് ഇന്ത്യയുടെ ഡെപ്യൂട്ടി ജനറല് മാനേജര് അനുപ് വിനായക് തരാലെയാണ് പരാതി സമര്പ്പിച്ചത്.
