തിരുവനന്തപുരം: തദ്ദേശ തിരഞ്ഞെടുപ്പിനായി പോളിംഗ് സ്റ്റേഷനുകളിലേക്ക് നിയോഗിക്കപ്പെട്ട ഉദ്യോഗസ്ഥര്ക്കു നല്കുക മെറ്റല് സീല് മുതല് തീപ്പെട്ടി വരെ 113 ഇനങ്ങള്.
ഒന്നൊഴിയാതെ അനിവാര്യമായ പോളിംഗ് സാമഗ്രികളാണ് വോട്ടിംഗ് പ്രക്രിയ സുഗമവും സുതാര്യവുമാക്കുക. അതാത് ബ്ലോക്ക്, കോര്പ്പറേഷന് വരണാധികാരികള്ക്കും ഉപവരണാധികാരികള്ക്കും സാമഗ്രികള് കൈമാറി.
വോട്ടര്മാരുടെ എണ്ണവും വിവരങ്ങളും അടങ്ങിയ 21 എ ഫോമുകള്, യന്ത്രങ്ങളുടെ മുദ്രണത്തിന് ഉപയോഗിക്കുന്ന വെള്ളചരട്, തപാല് വോട്ടര്മാരുടെ വിശദാംശങ്ങള് ഉള്ക്കൊള്ളിച്ച മാര്ക്ക്ഡ് വോട്ടര് പട്ടിക, വോട്ടര് പട്ടികയില് അടയാളംചെയ്യാന് ചുവന്ന മഷിയുള്ള പേന തുടങ്ങി ചെറുതും വലുതുമായ വസ്തുക്കളുണ്ട്. വോട്ടിംഗ്യന്ത്രത്തിന് തകരാര് സംഭവിച്ചാല് വിവരങ്ങള് വീണ്ടെടുക്കാന് സഹായിക്കുന്ന ഡിറ്റാച്ചബിള് മെമ്മറി മോഡ്യൂള്, പോളിംഗ് ബൂത്തില് വൈദ്യുതി തടസം നേരിട്ടാല് ഉപയോഗിക്കാനുള്ള മെഴുകുതിരിയും തീപ്പെട്ടിയും വരെ ഉള്പ്പെടുത്തിയിട്ടുണ്ട്.
ഓരോ ത്രിതല പഞ്ചായത്തുകള്ക്കും വ്യത്യസ്ത നിറത്തില് ക്രമീകരിച്ചിട്ടുള്ള ബാലറ്റ് ലേബലുകള്. വെള്ള നിറത്തിലുള്ള ബാലറ്റുകള് ഗ്രാമപഞ്ചായത്തിനും നീലനിറത്തിലുള്ളവ ജില്ലാ പഞ്ചായത്തിനും പിങ്ക് നിറത്തിലുള്ള ബാലറ്റുകള് ബ്ലോക്ക് പഞ്ചായത്തിനുമാണ്.
പ്രിസൈഡിംഗ് ഓഫീസര്മാര് മെഴുക് ഉപയോഗിച്ച് സീല് ചെയ്യുമ്പോള് ഉരുകിയ സീലിംഗ് മെഴുകില് പതിപ്പിക്കുന്ന മെറ്റല് സീല്, ഉത്തരവുകള്, നോട്ടീസുകള് എന്നിവയില് മുദ്രണം ചെയ്യാന് ഉപയോഗിക്കുന്ന റബര് സീലുകള് എന്നിവയും കൂട്ടത്തിലുണ്ട്. ബാലറ്റ് യൂണിറ്റും കണ്ട്രോള് യൂണിറ്റും സീല്ചെയ്യാന് ഉപയോഗിക്കുന്ന പിങ്ക് പേപ്പര് സീല്, മോക് പോള് നടത്തിയതിനുശേഷം വോട്ടിംഗ്യന്ത്രങ്ങള് സീല് ചെയ്യാന് ഉപയോഗിക്കുന്ന ഗ്രീന് പേപ്പര് സീല്, സ്ട്രിപ്പ് പേപ്പര് സീല്, പ്രിസൈഡിംഗ് ഓഫീസര്മാര്ക്ക് വോട്ടിങ്ങുമായി ബന്ധപ്പെട്ട നടപടിക്രമങ്ങള് വിവരിക്കുന്ന കൈപുസ്തകം എന്നിവയും പോളിംഗ് സാമഗ്രികളില് ഉള്പ്പെടുന്നു.
സിവില് സ്റ്റേഷനിലെ ഇലക്ഷന് ഗോഡൗണില് സൂക്ഷിച്ചിരുന്ന പോളിംഗ് സാമഗ്രികളാണ് വരണാധികാരികള്ക്ക് കൈമാറിയത്. ഇവ ഡിസംബര് 8ന് പോളിംഗ് ഉദ്യോഗസ്ഥര്ക്ക് വിതരണം ചെയ്യും.
തീപ്പെട്ടി മുതല് മെമ്മറി മോഡ്യൂള് വരെ, പോളിംഗ് സ്റ്റേഷനുകളിലേക്ക് നല്കുക 113 സാമഗ്രികള്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.