കൊച്ചി: വളരെ അപൂര്വമായി കണ്ടുവരുന്ന ‘ഫീറ്റസ് ഇന് ഫീറ്റു’ (Fetus in Fetu) രോഗാവസ്ഥ കണ്ടെത്തിയ കുഞ്ഞിന് കൊച്ചി അമൃത ആശുപത്രിയില് വിജയകരമായ ശസ്ത്രക്രിയ നടത്തി. ജനനത്തിന്റെ ആദ്യഘട്ടങ്ങളില് സാധാരണ ഭ്രൂണത്തിന്റെ ശരീരത്തിനുള്ളില് ദുര്വികസിതമായ മറ്റൊരു ഇരട്ട ഭ്രൂണം അടങ്ങിയിരിക്കുമ്പോഴാണ് ഈ അവസ്ഥരൂപം കൊള്ളുന്നത്.
ലോകത്ത് അഞ്ച് ലക്ഷം ജനനങ്ങളില് ഒരു കേസില് മാത്രമാണ് ഈ അപൂര്വത രേഖപ്പെടുത്തുന്നത്. എറണാകുളം സ്വദേശിനിയില് നടത്തിയ ഗര്ഭകാല പരിശോധനകള്ക്കിടയില് കൊച്ചി അമൃത ആശുപത്രിയിലെ ഫീറ്റല് കെയര് വിഭാഗത്തിലെ അഡീ. പ്രൊഫസര് ഡോ. വിവേക് കൃഷ്ണനും അസി. പ്രൊഫസര്മാരായ ഡോ. ധന്യ കീഴാറ്റൂരും ഡോ. ശ്രുതി സോമനും ടത്തിയ ആന്റിനേറ്റല് സ്കാനിങ്ങിലാണ് ഈ അസാധാരണ വളര്ച്ച ആദ്യം കണ്ടത്. ഉയര്ന്ന നിലവാരത്തിലുള്ള ഗര്ഭകാല സ്കാനിങ് വഴി വ്യക്തമായ അസാധാരണ അവസ്ഥ കണ്ടെത്തിയതോടെ വിദഗ്ധ നിരീക്ഷണം ആരംഭിച്ചു.
കുഞ്ഞ് ജനിച്ചശേഷം നടത്തിയ വിശദമായ പരിശോധനയില് വയറ്റിനുള്ളില് ജീവനില്ലാത്ത ഭ്രൂണാവശിഷ്ടം നിലനില്ക്കുന്നുവെന്ന് സ്ഥിരീകരിച്ചു.
വെറും രണ്ട് മാസം പ്രായത്തിലുള്ള പെണ്കുഞ്ഞില് നടത്തിയ ശസ്ത്രക്രിയയില് 48.7 ഗ്രാം ഭാരം വരുന്ന ഭ്രൂണാവശിഷ്ടം വിജയകരമായി നീക്കി.
അത്യന്തം അപൂര്വമായ ശസ്ത്രക്രിയക്ക് കൊച്ചി അമൃത ആശുപത്രിയിലെ പീഡിയാട്രിക് സര്ജറി വിഭാഗം എമറിറ്റസ് പ്രൊഫസര് ഡോ. മോഹന് എബ്രഹാം, അസോ. പ്രൊഫസര് ഡോ. അശ്വിന് പ്രഭാകരന്, അനസ്തേഷ്യോളജിസ്റ്റ് ഡോ. രേഖ വര്ഗീസ് എന്നിവര് നേതൃത്വം നല്കി. ഡോ. അഞ്ജു ആനന്ദും സ്റ്റെനി ഷാജിയും ശസ്ത്രക്രിയയില് പങ്കാളികളായി.
ഏകദേശം രണ്ട് മണിക്കൂര് നീണ്ടുനിന്ന ശസ്ത്രക്രിയക്കുശേഷം കുഞ്ഞിന്റെ ആരോഗ്യനില മികച്ച രീതിയില് സുഖം പ്രാപിച്ചുവരുകയാണെന്ന് കൊച്ചി അമൃത ആശുപത്രി അധികൃതര് അറിയിച്ചു.
