മുംബൈ ; ക്യാമ്പസിനുള്ളിൽ ബുർഖ നിരോധിച്ച് ഗോരേഗാവിലെ വിവേക് വിദ്യാലയ ജൂനിയർ കോളേജ് . മോഡേൺ ജീൻസ്, ഷോർട്ട്സ്, ക്രോപ്പ് ടോപ്പുകൾ എന്നിവ നിരോധിച്ചതിന് പിന്നാലെയാണ് കോളേജിൽ ബുർഖ, നിഖാബ് എന്നിവയ്ക്ക് നിരോധനമേർപ്പെടുത്തിയത്. മതപരമായ വസ്ത്രങ്ങൾ സാംസ്കാരികമായ വ്യത്യാസങ്ങൾ ഉണ്ടാക്കുന്നുവെന്ന് കോളേജ് അധികൃതർ പറഞ്ഞു.
ഗാലി ന്യൂസ് പോർട്ടലാണ് ഇതിന്റെ ദൃശ്യങ്ങൾ പുറത്ത് വിട്ടത് . ബുർഖ ധരിച്ച വിദ്യാർത്ഥികളെ കോളേജ് ഗേറ്റിൽ തടയുന്നത് വീഡിയോയിൽ കാണാം. മുസ്ലീം വിദ്യാർത്ഥികൾ പ്രിൻസിപ്പലുമായി കൂടിക്കാഴ്ച നടത്തിയെങ്കിലും തീരുമാനത്തിൽ മാറ്റം വരുത്താൻ അധികൃതർ തയ്യാറായിട്ടില്ല.
കോളേജ് ഗേറ്റ് വരെ ബുർഖ ധരിക്കാറുണ്ടെന്നും വാഷ്റൂമിൽ വസ്ത്രം മാറാറുണ്ടെന്നും പല വിദ്യാർത്ഥികളും റിപ്പോർട്ട് ചെയ്തിട്ടുണ്ട്. ക്ലാസുകൾ കഴിഞ്ഞാൽ അവർ ബുർഖ ധരിച്ച് വീട്ടിലേക്ക് പോകാറുണ്ടെന്നും അവർ പറയുന്നു. “എന്റെ ജീവിതകാലം മുഴുവൻ ഞാൻ ബുർഖ ധരിച്ചിട്ടുണ്ട്. ക്ലാസ്സിൽ ബുർഖ ധരിക്കാതെ ഇരിക്കുന്നതിൽ എനിക്ക് അസ്വസ്ഥത തോന്നുന്നു.” എന്നാണ് ചില വിദ്യാർത്ഥിനികൾ പറയുന്നത് . ബുർഖ ധരിക്കാനാകാതെ ക്ലാസിൽ കയറാൻ പറ്റില്ലെന്ന് പറഞ്ഞവരോട് ഡ്രസ് കോഡ് അംഗീകരിച്ചില്ലെങ്കിൽ കോളേജിൽ വരണ്ടെന്ന് തന്നെ അധികൃതർ പറഞ്ഞു . നിലവിൽ, ജൂനിയർ കോളേജ് വിഭാഗത്തിന് മാത്രമേ ഈ നിരോധനം ബാധകമാകൂ. സീനിയർ കോളേജിൽ അത്തരമൊരു നിയന്ത്രണമില്ല.
