തിരുവനന്തപുരം:സ്ഥാനാര്ത്ഥിക്കും ഭര്ത്താവിനും ബന്ധുക്കള്ക്കും നേരെ ലഹരി സംഘത്തിന്റെ ആക്രമണം. കഠിനംകുളത്താണ് സംഭവം.എല്ഡിഎഫ് സ്ഥാനാര്ത്ഥി എയ്ഞ്ചലിനും ബന്ധുക്കള്ക്കുമാണ് ലഹരി സംഘത്തിന്റെ ആക്രമണത്തില് പരിക്കേറ്റത്. പത്തിലധികം പേരെ പ്രതിയാക്കി കഠിനംകുളം പൊലീസ് കേസെടുത്തു.
തെരഞ്ഞെടുപ്പ് പ്രചാരണത്തിന് ശേഷം കഴിഞ്ഞ രാത്രി 9 മണിയോടെ ഭര്ത്താവുമൊത്ത് വീട്ടിലെത്തിയപ്പോഴാണ് മുന്നില് നാലംഗ സംഘം അസഭ്യംവിളിയും ബഹളവും നടത്തുന്നത് കണ്ടത്. ഇത് ചോദ്യം ചെയ്ത എയ്ഞ്ചലിന്റെ ഭര്ത്താവ് ഫിക്സ്വെല്ലിന് മര്ദ്ദനമേറ്റു.തടയാന് ശ്രമിച്ച എയ്ഞ്ചലിനെയും മര്ദ്ദിച്ചു.ആക്രമണത്തിനിടെ തറയില് വീണ ഇവരുടെ കാലില് തടി കൊണ്ട് അടിച്ചു. കഠിനംകുളം പൊലീസില് വിവരമറിയിച്ചെങ്കിലും പൊലീസ് എത്താന് വൈകിയതോടെ എയ്ഞ്ചല് ഭര്ത്താവിന്റെ ബന്ധുക്കളെ ബന്ധപ്പെട്ടു.ബന്ധുക്കള് എത്തിയപ്പോഴേക്കും കൂടുതല് പേരെത്തി അവരെയും മര്ദ്ദിച്ചു. എയ്ഞ്ചല്, ഭര്ത്താവ് ഫിക്സ്വെല്, ഭര്തൃസഹോദരന് മാക്സ്വെല്, ബന്ധുക്കളായ സനോജ്, അനീഷ് എന്നിവര്ക്കാണ് പരിക്കേറ്റത്.
വികലാംഗനായ മാക്സ്വെല്ലിന് കമ്പി കൊണ്ടുള്ള അടിയില് കാലില് പൊട്ടലുണ്ട്. അനീഷിന് മുഖത്തും തലയിലും കമ്പി കൊണ്ടുള്ള അടിയില് പരിക്കേറ്റു. കഠിനംകുളം പൊലീസ് എത്തിയപ്പോഴേക്കും അക്രമിസംഘം രക്ഷപ്പെട്ടു.
എന്നാല് പൊലീസ് പോയതിന് ശേഷം 20-ലധികം പേരുമായി എത്തിയ അക്രമിസംഘം സ്ഥാനാര്ത്ഥിയെയും ബന്ധുക്കളെയും വീണ്ടും ആക്രമിക്കുകയായിരുന്നു. വീടിനുള്ളില് കയറിയും മര്ദ്ദനം തുടരുകയും ചെയ്തു. പുറത്തുണ്ടായിരുന്ന ഇരുചക്ര വാഹനങ്ങളും അടിച്ചു തകര്ത്തു. പത്തിലധികം പേരെ പ്രതിയാക്കി കഠിനംകുളം പൊലീസ് കേസ് രജിസ്റ്റര് ചെയ്തു. എന്നാല് ആക്രമണം നടന്ന് മണിക്കൂറുകള് പിന്നിട്ടിട്ടും ലഹരി സംഘത്തെ കണ്ടെത്താന് പൊലീസിന് കഴിഞ്ഞിട്ടില്ല.
