കണ്ണൂര്: തദ്ദേശ തെരഞ്ഞെടുപ്പ് പടിവാതില്ക്കലെത്തി നില്ക്കേ സിപിഎമ്മിന്റെ ജമാ അത്തെ ഇസ്ലാമി ബന്ധം വീണ്ടും വിവാദത്തില്. ജമാ അത്തെ ഇസ്ലാമി കണ്ണൂര് ജില്ലാ കമ്മറ്റിയംഗത്തിന്റെ മകന് ബിലാല് ഇബ്നു അബ്ദുള്ളയുടെ സമൂഹ്യമാധ്യമ പോസ്റ്റാണ് ഇപ്പോള് സൈബര് ഇടത്തില് ചൂടുള്ള ചര്ച്ചയായത്.
യുഡിഎഫിന്റെ പ്രത്യേകിച്ച് കോണ്ഗ്രസിന്റെ, ജമാ അത്തെ ഇസ്ലാമി ബന്ധം വീണ്ടും ചര്ച്ചയായിരിക്കേയാണ് സിപിഎമ്മിന്റെ ജമാ അത്തെ ഇസ്ലാമി ബന്ധവും വീണ്ടും വാര്ത്തയാകുന്നത്.
‘ജമാ അത്തെ ഇസ്ലാമിക്കാരുമായി ഇലക്ഷനില് സഹകരിച്ചിട്ടില്ലെന്ന് പറയുന്ന സഖാക്കളോട് ഒരിക്കല് കൂടി പറയുന്നു, നിങ്ങളുടെ കമ്യൂണിസ്റ്റ് ദൈവം കെ.കെ. ശൈലജ കൂത്തുപറമ്പില് മത്സരിക്കുമ്പോള് ജമാ അത്തെ ഇസ്ലാമി കണ്ണൂര് ജില്ലാ കമ്മിറ്റി അംഗമായ എന്റെ പിതാവിന്റെ അടുക്കല്, എന്റെ വീട്ടില്, രാത്രി ജമാ അത്തെ ഇസ്ലാമിയുടെ വോട്ട് ചോദിച്ച് സാക്ഷാല് കെ.കെ. ശൈലജ വരികയും വന്നവര്ക്ക് എന്റെ ഉമ്മയുണ്ടാക്കിയ ഓറഞ്ച് ജൂസും ഒരു പ്ലേറ്റ് നിറയെ ഈന്തപ്പഴവും അണ്ടിപ്പരിപ്പും കൊടുത്തവനാണ് ഈ ഞാന്. ഉളുപ്പുണ്ടേല് ആ അണ്ടിപ്പരിപ്പിന്റെ പൈസ തിരിച്ചു താ’… ഈ പോസ്റ്റാണ് സാമൂഹ്യ മാധ്യമങ്ങളില് വിവാദമായത്.
ഇതിനെതിരേ മമ്പാട് സഖാഫി പ്രതികരിച്ചതിനും ബിലാല് ഇബ്നു മറുപടി നല്കി. പോസ്റ്റ് സഖാവ് മമ്പാട് സഖാഫിക്ക് സഹിച്ചിട്ടില്ല. സര്ക്കാസ സ്വരത്തില് പൈസ ചോദിച്ചതിനെ ‘കൊടുത്തത് തിരിച്ച് ചോദിക്കാന് പാടില്ലെന്ന്’ ഹദീസ് ഒക്കെ ഉദ്ധരിച്ച് ടിയാന് പ്രശ്നവത്കരിക്കുന്നുണ്ട്. വോട്ട് ചോദിച്ച് സഖാവ് സഖാഫിയുടെ സംസ്ഥാന നേതാക്കള് ജമാ അത്തെ ഇസ്ലാമി സംസ്ഥാന ഓഫീസിലും കേരള മുന് അമീര് ടി.കെ. അബ്ദുള്ള മൗലവിയുടെ വീട്ടിലും പിന്നെ കോടിയേരി ബാലകൃഷ്ണന് ജില്ലാ ഓഫീസുകളിലും നിരങ്ങിയത് മുഴുവന് സഖാക്കള് ഈ ഇലക്ഷന് സമയത്ത് നിഷേധിക്കുമ്പോള്, അതെന്താ സഖാവ് സഖാഫി കളവ് പറയാന് പാടില്ലെന്ന ഹദീസ് സഖാക്കളോട് പറഞ്ഞ് കൊടുക്കാത്തതെന്നാണ് മറുപടി.
തെരഞ്ഞെടുപ്പ് സമയത്തെ പോസ്റ്റും തുടര്ന്നുള്ള വിവാദവും സിപിഎമ്മിന് പൊല്ലാപ്പായിട്ടുണ്ട്.
