ആഗ്ര: വോട്ടർ പട്ടിക പുതുക്കുന്ന സ്പെഷ്യൽ ഇന്റൻസീവ് റിവിഷൻ (എസ്ഐആർ) പ്രക്രിയ പുരോഗമിക്കുമ്പോൾ, സ്വന്തമായി വായിക്കാനോ എഴുതാനോ ഫോമുകൾ പൂരിപ്പിക്കാനോ കഴിയാത്ത ആളുകളെ ഉത്തർപ്രദേശിലുടനീളം സഹായിക്കുന്നതിനായി സേവന സംരംഭം ആരംഭിക്കുമെന്ന് ജാമിയത്ത് ഉലമ ഇഹിന്ദ് പ്രഖ്യാപിച്ചു.
യുപിയിലുടനീളമുള്ള ജില്ലാ മേധാവികൾക്ക് ക്യാമ്പുകൾ സ്ഥാപിക്കാൻ നിർദ്ദേശം നൽകിയിട്ടുണ്ടെന്ന് ജാമിയത്ത് ഉലമ ഇ ഹിന്ദ് ദേശീയ ജനറൽ സെക്രട്ടറി മൗലാന മുഹമ്മദ് ഹക്കിമുദ്ദീൻ ഖാസിമി പറഞ്ഞു. ‘ഈ സംരംഭം യുപിയിൽ മാത്രമായി പരിമിതപ്പെടുത്തിയിട്ടില്ല. എസ്ഐആർ നടത്തുന്നിടത്തെല്ലാം ഞങ്ങൾ പിന്തുണ നൽകും,’ അദ്ദേഹം പറഞ്ഞു.
വോട്ടർ പട്ടികയിൽ യോഗ്യരായ ആരും തന്നെ ഒഴിവാക്കപ്പെടുന്നില്ലെന്ന് ഉറപ്പാക്കാൻ സംസ്ഥാനത്തെ പല ജില്ലകളിലും ഹെൽപ്പ് ഡെസ്കുകളും ക്യാമ്പുകളും ഇതിനകം സ്ഥാപിച്ചിട്ടുണ്ടെന്ന് മുതിർന്ന അംഗങ്ങൾ പറഞ്ഞു.
ഈ സംരംഭം പൊതുജനങ്ങളുടെ ബുദ്ധിമുട്ടുകൾ ലഘൂകരിക്കുക മാത്രമല്ല, ഉത്തരവാദിത്വങ്ങളുടെ പെട്ടെന്നുള്ള വർദ്ധനവിൽ ബുദ്ധിമുട്ടുന്ന ബൂത്ത് ലെവൽ ഓഫീസർമാരുടെ (ബിഎൽഒ) കനത്ത ജോലിഭാരം കുറയ്ക്കുകയും ചെയ്യുന്നുണ്ടെന്ന് സംഘടനയുമായി ബന്ധപ്പെട്ട മതനേതാക്കൾ പറഞ്ഞു. ‘എസ്ഐആർ ഫോമുകൾ ഫയൽ ചെയ്യാൻ ആളുകളെ സഹായിക്കുന്നത് പൗരന്മാർക്ക് ഗുണം ചെയ്യുക മാത്രമല്ല, പ്രദേശത്തെ ബിഎൽഒകളുടെ ഭാരം ഗണ്യമായി ലഘൂകരിക്കുകയും ചെയ്യുന്നു,’ ജാമിയത്തിന്റെ മുസാഫർനഗർ യൂണിറ്റ് പ്രസിഡന്റ് മൗലാന മുക്കാറം ഖാസിമി പറഞ്ഞു, നിലവിൽ ജില്ലയിൽ മാത്രം 35 ക്യാമ്പുകൾ പ്രവർത്തിക്കുന്നുണ്ടെന്ന് അദ്ദേഹം കൂട്ടിച്ചേർത്തു.
‘മുസാഫർനഗറിലെ 14 യൂണിറ്റുകളും ഈ സേവനത്തിൽ പൂർണ്ണമായും ഏർപ്പെട്ടിരിക്കുന്നു. ഈ ക്യാമ്പുകൾ ഹിന്ദുവോ മുസ്ലീമോ ആകട്ടെ എല്ലാവർക്കും തുറന്നിരിക്കുന്നു, ആർക്കും വന്ന് അവരുടെ ഫോമുകൾ പൂരിപ്പിക്കാം. ഞങ്ങളുടെ വളണ്ടിയർമാർ മതപരമായ പരിധികൾക്കപ്പുറം പ്രവർത്തിക്കുന്നു.’
എന്നിരുന്നാലും, നിരവധി വെല്ലുവിളികൾ നിലനിൽക്കുന്നുണ്ടെന്ന് അംഗങ്ങൾ പറഞ്ഞു. വിവാഹശേഷം മുസാഫർനഗറിലേക്ക് മാറിയ നിരവധി സ്ത്രീകൾക്ക് അവരുടെ മാതാപിതാക്കളുമായി ബന്ധിപ്പിച്ച വോട്ടർ വിവരങ്ങൾ ലഭിക്കാൻ ബുദ്ധിമുട്ടുന്നുണ്ടെങ്കിലും മറ്റുള്ളവർക്ക് അവരുടെ ഐഡികൾ കണ്ടെത്താൻ കഴിയുന്നില്ല. പരിഹാരങ്ങൾ തേടുന്നതിനായി ജാമിയത്ത് യൂണിറ്റുകൾ ടഉങകളുമായും മുതിർന്ന ഉദ്യോഗസ്ഥരുമായും ബന്ധപ്പെട്ടിട്ടുണ്ട്.
അലിഗഡിൽ, കഴിഞ്ഞ രണ്ടാഴ്ചയായി ജാമിയത്ത് ആളുകളെ സഹായിക്കുന്നുണ്ടെന്നും വിദ്യാസമ്പന്നരായ യുവാക്കളോട് സന്നദ്ധസേവനം നടത്താൻ പ്രേരിപ്പിച്ചിട്ടുണ്ടെന്നും ജില്ലാ പ്രസിഡന്റ് മുഫ്തി അക്ബർ ഖാസിമി പറഞ്ഞു. അലിഗഡ് നഗരത്തിൽ മൂന്ന് സഹായ കേന്ദ്രങ്ങൾ പ്രവർത്തിക്കുന്നുണ്ട്. ആഗ്രയിലും സംഘടന വീടുതോറുമുള്ള ബോധവൽക്കരണ പരിപാടികൾ നടത്തുന്നുണ്ട്.
