കൊച്ചി: കോര്പറേഷനില് പത്താം വാര്ഡ് രവിപുരം എന്ഡിഎ സ്ഥാനാര്ത്ഥി മുത്തു എന്നറിയപ്പെടുന്ന സി.ജി. രാജഗോപാല് അക്ഷരാര്ത്ഥത്തില് എറണാകുളത്തിന്റെ മുത്താണ്. നിറചിരിയോടെ എല്ലാവരുമായി സൗഹൃദം പുലര്ത്തുന്ന മുത്തുവിനെ അറിയാത്തവരായി എറണാകുളത്ത് ആരും ഉണ്ടാകില്ല. വലിപ്പ ചെറുപ്പമന്യേ എല്ലാവരുമായി മുത്തുവിനു സൗഹൃദമുണ്ട്. ചെറിയ കുട്ടികളെ കാണുമ്പോള് അവരിലൊരാളായി മാറും.
ജസ്റ്റിസ് വി.ആര്. കൃഷ്ണയ്യര്, പ്രൊഫ. എം.കെ. സാനു തുടങ്ങിയ വരുടെ ജീവിതകാലത്ത് മുത്തു സന്തതസഹചാരിയായിരുന്നു. മമ്മൂട്ടി, മോഹന്ലാല് എന്നിവരുമായി അടുത്ത ബന്ധമുണ്ട്. എറണാകുളം കരയോഗം, ചാവറ കള്ച്ചറല് സെന്റര്, പിഒസി, ക്രിസ്ത്യന് സഭകള്… എല്ലാവര്ക്കും പ്രിയപ്പെട്ടവന്. പണ്ഡിറ്റ് കറുപ്പന് വിചാരവേദി സെക്രട്ടറി, മഹാകവി കാളിദാസ സാംസ്കാരിക വേദി, ശ്രീരാമകൃഷ്ണ സേവാശ്രമത്തിന്റെ ട്രസ്റ്റി തുടങ്ങി സേവന മേഖലകളില് നിറഞ്ഞുനില്ക്കുന്നു. എറണാകുളത്ത് മുത്തുവിനെ അറിയാത്തവരും മുത്തു അറിയാത്തവരുമായി ആരെങ്കിലുമുണ്ടോയെന്നാണ് സംശയം.
1990കളില് റോഡുകള് വൃത്തിയാക്കിയാണ് പൊതുരംഗത്തെത്തിയത്. ശ്രീരാമകൃഷ്ണ സേവാശ്രമവുമായി ബന്ധപ്പെട്ട് കുട്ടികള്ക്കായി നിരവധി സേവനങ്ങള് നടത്തിയിട്ടുണ്ട്. സാനുമാഷും ഡോ. സി.കെ. രാമചന്ദ്രനുമൊരുമിച്ച് സിനിമ കാണാന് പോയ അനുഭവവും മുത്തുവിനുണ്ട്. ഉത്തര്പ്രദേശ് ഗവര്ണര് ആനന്ദിബെന് പട്ടേല് കഴിഞ്ഞമാസം എറണാകുളത്ത് അന്താരാഷ്ട്ര പുസ്തകോത്സവം ഉദ്ഘാടനം ചെയ്യാന് വന്നപ്പോള് മുത്തു എന്ന് അഭിസംബോധന ചെയ്ത് ആ സൗഹൃദ പ്രസംഗത്തില് പറയുകയുണ്ടായി.
എല്ലാ വിഭാഗം ജനങ്ങളുമായുള്ള അടുത്ത ബന്ധമാണ് മത്സരിക്കുമ്പോള് മുത്തുവിന് കരുത്താകുന്നത്. നാലായിരത്തിലധികം വോട്ടുകളാണ് ഈ വാര്ഡില് ഉള്ളത്. 1200ലധികം വീടുകള്. എല്ലാവരെയും പേരെടുത്ത് പറഞ്ഞ് സ്നേഹത്തോടെ സംസാരിക്കാന് അദ്ദേഹത്തിന് സാധിക്കുന്നു. 22000 ഫോണ് നമ്പറുകളാണ് ഇദ്ദേഹത്തിന്റെ ഫോണിലുള്ളത്. ആര്ക്കും എപ്പോള് വേണമെങ്കിലും വിളിക്കാം.
കഴിഞ്ഞ തവണ 40 വോട്ടുകള്ക്കാണ് എന്ഡിഎ സ്ഥാനാര്ത്ഥി ഈ വാര്ഡില് പരാജയപ്പെട്ടത്. അതുകൊണ്ടുതന്നെ എന്തുവിലകൊടുത്തും വാര്ഡ് പിടിക്കാനായി അരയും തലയും മുറുക്കി പ്രവര്ത്തകര് രംഗത്തുണ്ട്. ജനോപകാരപ്രദമായ കേന്ദ്ര പദ്ധതികളാണ് അനുകൂല ഘടകമെന്ന് സി.ജി. രാജഗോപാല് പറയുന്നത്. കേന്ദ്ര പദ്ധതികള് കൊണ്ടാണ് കൊച്ചി കോര്പറേഷന് നിലനില്ക്കുന്നത്. എന്നാല് ഈ വാര്ഡുകളിലൊന്നും തന്നെ യാതൊരു അടിസ്ഥാന സൗകര്യവും ഉണ്ടായിട്ടില്ല. പുറംകാഴ്ചമാത്രമേയുള്ളു. അകത്തളങ്ങളില് ചേരികളാണ്. ഇത് കൊച്ചിയുടെ മറ്റൊരു മുഖമാണ്. ഈ വാര്ഡിലെ ഫിഷറീസ് കോളനിയുടെ അവസ്ഥ വളരെ ദയനീയമാണെന്ന് അദ്ദേഹം ചൂണ്ടിക്കാണിക്കുന്നു. പല വീടുകളിലും വൈദ്യുതി പോലുമില്ലാത്ത അവസ്ഥയാണ്. പുറംമോടികള് മാത്രമാണ് അവകാശപ്പെടാനുള്ളത്. കേരളത്തില് കേന്ദ്ര സര്ക്കാര് അനുവദിച്ച പദ്ധതികളെല്ലാം നഗരത്തിന്റെ ബ്യൂട്ടിഫിക്കേഷനായി ചെലവഴിക്കുകയും എന്നാല് സാധാരണക്കാര്ക്കായി അടിസ്ഥാന സൗകര്യം ഒരുക്കുവാനും തയാറായിട്ടില്ല. ബിജെപി സാധാരണക്കാരുടെ അടിസ്ഥാന പ്രശ്നങ്ങള് പരിഹരിക്കാനാവും ശ്രമിക്കുക. മെട്രോ നഗരത്തിന്റെ വികസനത്തിന് ബിജെപിയുടെ വിജയം അനിവാര്യമാണ്. സ്ഥാനാര്ത്ഥിയെന്ന നിലയില് വളരെ അടുത്ത ബന്ധമാണ് ജനങ്ങളുമായുള്ളത്.
ഓരോ വീടുകളിലും കയറിയിറങ്ങി പരിചയങ്ങള് പുതുക്കിയാണ് സി.ജി. രാജഗോപാലിന്റെ പ്രചരണം. സ്ഥാനാര്ത്ഥിയാണെന്ന് ആരോടും പറഞ്ഞ് പരിചയപ്പെടുത്തേണ്ടതില്ലെന്നതാണ് പ്രത്യേകത. എല്ലാവരോടും പരിചയം പുതുക്കുക മാത്രം ചെയ്താല് മതി. 2005ല് കോര്പറേഷനിലും അതിനുശേഷം മൂന്നു തവണ നിയമസഭയിലേക്കും ജനവിധി തേടിയിരുന്നു. അഞ്ചാമത്തെ മത്സരമാണിത്.
ജന്മഭൂമി ഓണ്ലൈന്