സാമ്പത്തികവളര്ച്ചയുടെയും സാമൂഹിക വികസനത്തിന്റെയും ഒന്നിച്ചുള്ള മുന്നേറ്റത്തിന്റെ രേഖാചിത്രമാണ് പ്രധാനമന്ത്രി നരേന്ദ്ര മോദി തന്റെ വികസന കാഴ്ചപ്പാടിലൂടെ പ്രകടമാാക്കുന്നത്. ഭാരതത്തിന്റെ സാമ്പത്തിക വികനസത്തെ ലോകോത്തര നിലവാരത്തിലേക്കു നയിക്കുന്ന നൂതന സമതുലിത വികസനത്തിന്റെ വിജയഗാഥയാണ് ലോകരാഷ്ടങ്ങള്ക്കു മുമ്പില് അവതരിപ്പിക്കുന്നത്. ഏവരേയും ഉള്ക്കൊള്ളുന്ന, സര്വ്വാശ്ലേഷിയായ വികസനമാര്ഗ്ഗമാണ് (ഇന്ക്ലൂസീവ് ഡെവലപ്മെന്റ് മോഡല്) മോദി നടപ്പാക്കുന്നത്. സാമ്പത്തിക വളര്ച്ചയുടെയും സാമൂഹിക ഉന്നമനത്തിന്റെയും സാമ്പത്തിക പാഠത്തിലൂന്നിയ വികസന നയാവിഷ്ക്കാരം മോദിയുടെ ഭാരത വികസനത്തെ അന്വര്ത്ഥമാക്കുന്നവയാണ്.
ഈയിടെ ഭാരതം സന്ദര്ശിച്ച ഐക്യരാഷ്ട വികസന പദ്ധതിയുടെ ആക്ടിങ് അഡ്മിനിസ്ട്രേറ്റര് ഹാവോലിയാംഗ് സൂ ദക്ഷിണരാഷ്ടങ്ങള്ക്കുള്ള ഗുണപാഠമാണ് ഭാരതത്തിന്റെ വികസന പദ്ധതി സമാവിഷ്ക്കരിച്ചിരിക്കുന്നത് എന്ന് പറഞ്ഞിരുന്നു. ഇന്ത്യന് സാമ്പത്തിക വളര്ച്ചയുടെ ഗീതങ്ങള് സാമ്പത്തിക വികസനത്തിന്റെ മാത്രം കഥകള് ഉദ്ഘോഷിക്കുന്നവയല്ല. അതു ലോകമെമ്പാടും വളര്ച്ച പ്രാപിച്ചുകൊണ്ടിരിക്കുന്ന സാങ്കേതിക വിദ്യയുടെയും പങ്കാളിത്ത ഭരണനിര്വഹണ സംവിധാനത്തിന്റെയും സംയുക്ത സമ്മിശ്രണത്തിന്റെ ഫലപ്രാപ്തി കൂടി ലക്ഷ്യമാക്കുന്നവയാണ്. ആഗോള കാലാവസ്ഥാ വ്യതിയാനത്തെ തടയാനും, പുനരുപയോഗ ഊര്ജ്ജശ്രോതസ്സുകളുടെ വിന്യാസത്തെ ലോക ജനതയുടെ ഭാവി ജീവിതങ്ങളെ പ്രസ്പുഷ്ടമാക്കാനും, എല്ലാവര്ക്കും ഒരുപോലെ പ്രയോജനകരമാംവിധം വികസിതമായിക്കൊണ്ടിരിക്കുന്ന ഡിജിറ്റല് സാങ്കേതികവിദ്യയുടെ സാര്വത്രിക വിന്യാസത്തിലൂടെ ധനവിഭവ സമൃദ്ധിയുടെ സമതുലിത വിതരണം സാര്ത്ഥകമാക്കാനുമുള്ള മോദി സര്ക്കാരിന്റെ പ്രതിജ്ഞാബന്ധതയെ സൂ പ്രശംസിക്കുകയുണ്ടായി.
പ്രധാനമന്ത്രി ഭാരത ജനതയുടെ സാമ്പത്തിക നേട്ടങ്ങള്ക്കായി ആവിഷ്ക്കരിച്ച ക്ഷേമോന്മുഖ വികസന മാതൃക ഭാരതീയര്ക്കാകമാനം പ്രയോജനപ്പെടുന്ന ഡിജിറ്റല് സാങ്കേതികവിദ്യയിലൂന്നിയ നൂതന വികസന പദ്ധതിയാണ്. ഉത്പാദന രംഗത്തും സാമൂഹികസേവന രംഗത്തും ഭാരതം വരച്ചുകാട്ടിയ വികസന തന്ത്രങ്ങള് അവികസിത – വികസ്വര-വികസിത രാഷ്ടങ്ങള്ക്ക് നല്കുന്നത് വികസനത്തെ സംബന്ധിച്ച പുത്തന് മാര്ഗ്ഗരേഖകളാണ്. വ്യാവസായിക മേഖലക്കായി അവതരിപ്പിച്ച ഉത്പദനാധിഷ്ഠിത പ്രോത്സാഹന പദ്ധതിയും സാമൂഹികവികസനത്തിനായി നടപ്പാക്കിയ ഫലാധിഷ്ഠിത പ്രോത്സാഹന പദ്ധതിയും പരിവര്ത്തനോന്മുഖ ഭാരതത്തിന്റെ വികസന പരിപ്രേക്ഷ്യങ്ങളായിരുന്നു. ഈ രണ്ടു പദ്ധതികളുടെയും ഫലപ്രദമായ ആവിഷക്കാരമായിരുന്നു ഇക്കഴിഞ്ഞ ബീഹാര് അസംബ്ലി തെരഞ്ഞെടുപ്പില് എന്. ഡി. ഏയെ വിജയത്തിലേക്കു നയിച്ച പ്രധാനഘടകം . ഉല്ലാദന മേഖലയില് ആവിഷ്കരിച്ച ഉല്പന്നാധിഷ്ഠിത പ്രോത്സാഹന നടപടികള് സാമ്പത്തിക മേഖലയുടെ വികസനം ത്വരിതപ്പെടുത്തുവാന് പോരുന്നവയായിരുന്നു. സാമൂഹിക രംഗത്ത് ആവിഷ്ക്കരിച്ച് നടപ്പാക്കിയ ഫലാധിഷ്ഠിതപ്രോത്സാഹന പദ്ധതികള് സാമൂഹിക-സേവനമേഖലകളില് വന് നേട്ടങ്ങള് കാഴ്ചവയ്ക്കുകയുണ്ടായി. ഭാരതത്തിന്റെ സാമൂഹിക പരിസ്ഥിതി വ്യവസ്ഥയെ പ്രഫുല്ലമാക്കുന്നതില് ഫലപ്രാപ്തിയധിഷ്ഠിത പ്രോത്സാഹന പദ്ധതികള് ഏറെ പ്രയോജനകരമായി.
ലാഭരഹിത പദ്ധതികളായ ഹക്ദര്ശ്, ക്ലിക്ക്, ഇന്ഡസ് ആക്ഷന്, സാധാരണക്കാരായ ജനങ്ങള്ക്കു വേണ്ടിയുള്ള പദ്ധതികള് ആകുന്നു. കുട്ടികള്ക്കു വേണ്ടിയുള്ള വികസന- പ്രോത്സാഹന പദ്ധതി എന്നിവയും ഏറെ ഫലപ്രദവും താഴെക്കിടയിയില് നിന്നുള്ള വിദ്യാര്ത്ഥികള്ക്ക് ഗുണകരവുമായിരുന്നു.
സൗജന്യ പാചക വാതക വിതരണ പദ്ധതിയായ ‘ഉജ്ജ്വല്’, താഴെക്കിടയിലുള്ളവര്ക്കായി നടപ്പാക്കിയ പാര്പ്പിട പദ്ധതിയായ പ്രധാനമന്ത്രി ആവാസ് യോജന, ശുചിമുറികള് പ്രദാനം ചെയ്യുന്ന സ്വച്ഛ് ഭാരത് പദ്ധതി, സ്ത്രീകള്ക്കായുള്ള ‘ ലക്ഷാധിപതി ദീദി’ പദ്ധതി, വനിതകള്ക്കായുള്ള തൊഴില് സൃഷ്ടി പദ്ധതിയായ മഹിളാ റോസ് ഗാര് പദ്ധതി പ്രകാരം 10,000 രുപ ബാങ്ക് അക്കൗണ്ടിലേക്കു നേരിട്ട് ലഭ്യമാവുന്ന പദ്ധതി മുഖാന്തിരം സ്ത്രീകള്ക്ക് സംരംഭകരാന് അവസരമൊരുക്കുന്ന പദ്ധതി, സ്കൂള് വിദ്യാഭ്യാസ രംഗത്ത് ആവിഷ്ക്കരിച്ച പിഎംശ്രീ പദ്ധതി, പരമ്പരാഗതകര കൗശല തൊഴിലാളുടെ ഉന്നമനത്തിനായി ആവിഷ്ക്കരിച്ച പി.എം. വിശ്വകര്മ്മ യോജന’ , എന്നിവ അവരുടെ ജീവിതാഭിലാഷപൂര്ത്തികരണത്തിനായുള്ള പദ്ധതിയായി പരിണമിച്ചത് എടുത്തു പറയത്തക്കതാകുന്നു. പ്രധാനമന്ത്രി കൗശല് വികാസ് യോജന, ദീനദയാല് ഉപാധയ ഗ്രാമീണ കൗശല്യയോജന എന്നിവ തൊഴില് അവസരങ്ങള് പ്രദാനം ചെയ്യുന്ന പദ്ധതികളാകുന്നു. പി.എം ഇന്ടേന്ഷിപ്പ് പദ്ധതി അഭ്യസ്തവിദ്യര്ക്കുളള നൈപുണ്യ വികസന പദ്ധതി തൊഴില് തേടുന്നവര്ക്കുള്ള അത്താണിയാകുന്നു. ആയുഷ്മാന് ഭാരത് സാധാരണക്കാര്ക്കു ചികിത്സാ ധനസഹായമായി 5 ലക്ഷം രൂപ വരെ ലഭ്യമാക്കുന്ന ചികിത്സാ സഹായ പദ്ധതിയാണ്.
(ബാംഗ്ലൂര് ഇന്ദിരാ ഗാന്ധി നാഷനല് സെന്റര് ഫോര് ദ് ആര്ട്ട്സ്, മുന് ടാഗോര് നാഷനല് ഫെല്ലോയാണ് ലേഖകന്)
ജന്മഭൂമി ഓണ്ലൈന്