ന്യൂദല്ഹി: ദല്ഹി സ്ഫോടനത്തില് അറസ്റ്റിലായ ഡോക്ടര്മാര്ക്ക് പാക് ഭീകര സംഘടനകളുമായി നേരിട്ട് ബന്ധമുള്ളതായി എന്ഐഎ കണ്ടെത്തി. സ്ഫോടനത്തില് കൊല്ലപ്പെട്ട ഉമര് നബിക്ക് (ഉമര് മുഹമ്മദ്) ജയ്ഷെ മുഹമ്മദുമായി ബന്ധമുള്ളതിന്റെ നിര്ണായക തെളിവുകള് ഇയാളുടെ മൊബൈലില് നിന്നും അന്വേഷണ സംഘത്തിന് ലഭിച്ചു. വനിതാ ഡോക്ടര് ഷഹീന് ഷാഹിദ്, ലഷ്കറുമായി ബന്ധപ്പെട്ടിരുന്നതിന്റെ ഡയറിക്കുറിപ്പുകളും ലഭിച്ചിട്ടുണ്ട്.
ജയ്ഷെ- ഇ- മുഹമ്മദിന്റെ ഫരീദാബാദ് മൊഡ്യൂളിലെ പ്രധാന അംഗമായിരുന്നു ഡോ. ഷഹീന്. ഇവര് ലഷ്കര് ഇ തൊയ്ബയുമായി ബന്ധപ്പെട്ടിരുന്നതിന്റെ ഡയറിക്കുറിപ്പുകളും കണ്ടെടുത്തിട്ടുണ്ട്. സ്ഫോടനത്തിനു പിന്നിലുള്ളവരെ ഏകോപിപ്പിച്ചത് ഇവരാണ്. പാകിസ്ഥാന് കേന്ദ്രീകരിച്ചു പ്രവര്ത്തിക്കുന്ന ഭീകര സംഘടനകളുമായി ഇവര് നിരന്തരം ആശയവിനിമയം നടത്തിയിട്ടുണ്ട്. ഭാരതത്തില് ജയ്ഷെ വനിതാ വിഭാഗത്തിന് നേതൃത്വം നല്കിയത് ഷഹീനാണ്. വ്യത്യസ്ത വിലാസങ്ങളിലുള്ള മൂന്ന് പാസ്പോര്ട്ടുകളും ഇവര്ക്കുണ്ട്. മൂന്നിലേയും വിലാസവും വ്യത്യസ്തമാണ്. ഒന്നില് കാണ്പൂര് ജിഎസ്വിഎം മെഡിക്കല് കോളജിന്റെ വിലാസവും, രണ്ടാമത്തേതില് ലഖ്നൗവിലെയും മൂന്നാമത്തേതില് ഫരീദാബാദിലെയും വിലാസവുമാണ് നല്കിയിട്ടുള്ളത്. അച്ഛനേയും ഭര്ത്താവിനെയും സഹോദരനെയും രക്ഷാകര്ത്താക്കള് ആക്കിയാണ് ഇവര് പാസ്പോര്ട്ടെടുത്തത്.
കൂടാതെ ഷഹീന് മൂന്ന് തവണ പാകിസ്ഥാന് സന്ദര്ശിച്ചതായും എന്ഐഎ കണ്ടെത്തി. കാണ്പൂര് ജിഎസ്വിഎം മെഡിക്കല് കോളജില് നിന്നും 2013ല് ജോലി ഉപേക്ഷിച്ച ഇവര് തായ്ലന്ഡിലേക്ക് പോയി. പിന്നീട് ഭാരതത്തില് തിരിച്ചെത്തിയാണ് ഫരീദാബാദ് അല്- ഫലാഹ് മെഡിക്കല് കോളജില് ജോലിയില് പ്രവേശിക്കുന്നത്.
