ബെംഗളൂരു: ബെംഗളൂരുവിൽ വ്യാജ നന്ദിനി നെയ്യ് ഉൾപ്പെടുന്ന ഒരു വലിയ മായം ചേർക്കൽ റാക്കറ്റ് പിടിയിൽ. വ്യാജ ഉൽപ്പന്നത്തിൽ മൃഗക്കൊഴുപ്പ് ഉപയോഗിച്ചിട്ടുണ്ടോ എന്ന് പോലീസ് അന്വേഷിക്കുന്നുണ്ട്. ഏകദേശം ഒരു കോടി രൂപയുടെ വ്യാജ നെയ്യാണ് പിടികൂടി. മായം ചേർത്ത പാലുൽപ്പന്നങ്ങൾ നിർമ്മിച്ച് വിതരണം ചെയ്യുന്ന സംഘത്തിലെ നാലുപേരെ അറസ്റ്റ് ചെയ്തു. ചാമരാജ്പേട്ടയിലെ നഞ്ചംബ അഗ്രഹാരയിലുള്ള കൃഷ്ണ എന്റർപ്രൈസസ് ഉടമയുൾപ്പെടെയുള്ളവരെയാണ് അറസ്റ്റ് ചെയ്തത്.
വ്യാജ നന്ദിനി ബ്രാൻഡ് സഞ്ചികളിലും പ്ലാസ്റ്റിക് കുപ്പികളിലും നിറച്ച് ബെംഗളൂരുവിലുടനീളം വിറ്റഴിച്ച സംഘത്തിൽ പെട്ടവരാണിവർ. 8136 ലിറ്റർ മായം ചേർത്ത നെയ്യ്, തേങ്ങ, പാം ഓയിൽ, 1.19 ലക്ഷം രൂപ, ഗതാഗതത്തിന് ഉപയോഗിച്ച നാലു ചരക്കുവാഹനങ്ങൾ, നിർമാണ യന്ത്രങ്ങൾ, മറ്റ് അനുബന്ധ വസ്തുക്കൾ എന്നിവ പിടിച്ചെടുത്തു. ഇവയുടെ ആകെ മൂല്യം ഏകദേശം 1.27 കോടി രൂപയാണെന്ന് ബെംഗളൂരു പൊലീസ് കമീഷണർ സീമന്ത് കുമാർ സിങ് പുറത്തിറക്കിയ വാർത്തക്കുറിപ്പിൽ പറഞ്ഞു.
മായം ചേർത്ത നെയ്യ് ഉൽപ്പാദിപ്പിക്കുന്ന യൂണിറ്റ് തമിഴ്നാട്ടിലെ തിരുപ്പൂർ ജില്ലയിലായിരുന്നു. പ്രധാന പ്രതിയെക്കുറിച്ചുള്ള വിവരങ്ങൾ ശേഖരിച്ചുവരികയാണ്. പ്രതികൾ കഴിഞ്ഞ രണ്ട് വർഷമായി സജീവമായിരുന്നു,” ബെംഗളൂരു പോലീസ് കമ്മീഷണർ സീമന്ത് കുമാർ സിംഗ് പറഞ്ഞു. സിസിബി പ്രത്യേക അന്വേഷണ വിഭാഗത്തിൽ കേസ് രജിസ്റ്റർ ചെയ്തിട്ടുണ്ട്. കൂടുതൽ അന്വേഷണം പുരോഗമിക്കുകയാണ്.
