ഫരീദാബാദ്: ഹരിയാനയിലെ ഫരീദാബാദിൽ തീവ്രവാദികളുമായി ബന്ധമുണ്ടെന്ന് ആരോപിച്ച് അറസ്റ്റിലായ ഡോക്ടറുടെ വീട്ടിൽ നിന്ന് കണ്ടെത്തിയത് വൻ ആയുധ ശേഖരം. കഴിഞ്ഞ ദിവസം അനന്ത്നാഗിൽ അറസ്റ്റിലായ ഡോക്ടർ ആദിൽ അഹമ്മദിന്റെ മൊഴിയുടെ അടിസ്ഥാനത്തിൽ, പോലീസ് ധാരാളം ആർഡിഎക്സ്, എകെ 47, ലൈവ് വെടിയുണ്ടകൾ എന്നിവ വീട്ടിൽ നിന്നും കണ്ടെടുത്തു. ജമ്മു കശ്മീർ പോലീസ് ആണ് ഈ റെയ്ഡ് നടത്തിയത്. ഡോക്ടറുടെ വീട്ടിൽ നിന്ന് ഏകദേശം 350 കിലോഗ്രാം ആർഡിഎക്സും കണ്ടെടുത്തു.
പോലീസ് ഈ മുഴുവൻ ഓപ്പറേഷനും രഹസ്യമായാണ് നടത്തിയത്. ഞായറാഴ്ച എ.ടി.എസ് നടത്തിയ വൻ റെയ്ഡുകളെക്കുറിച്ച് ഇതുവരെ റിപ്പോർട്ടുകൾ പുറത്ത് വന്നിരുന്നില്ല. ഭീകര സംഘടനയായ ജെയ്ഷ്-ഇ-മുഹമ്മദുമായി ബന്ധമുണ്ടെന്ന് ആരോപിച്ചാണ് ജമ്മു കശ്മീർ പോലീസ് അനന്ത്നാഗിൽ നിന്ന് ഉത്തർപ്രദേശിലെ സഹാറൻപൂരിൽ നിന്നുള്ള ഡോക്ടർ ആദിലിനെ അറസ്റ്റ് ചെയ്തത്. തുടർന്നാണ് ഫരീദാബാദിലെ ഡോക്ടറുടെ വാടക മുറി ജമ്മു കശ്മീർ പോലീസ് റെയ്ഡ് ചെയ്തത്. ഏകദേശം 12 പോലീസ് വാഹനങ്ങളിലെത്തിയ അന്വേഷണ സംഘം ഫരീദാബാദ് പ്രദേശത്ത് ഡോക്ടർ വാടക വീട്ടടിൽ താമസിച്ചിരുന്ന പ്രദേശം വളഞ്ഞു. ഡോ. ആദിലിനെയും പോലീസ് അവരോടൊപ്പം കൊണ്ടുപോയിരുന്നു. തുടർന്ന്
ഡോക്ടറുമായി പോലീസ് അകത്തേക്ക് കയറി റെയ്ഡ് നടത്തി ആയുധ ശേഖരം പിടിച്ചെടുത്തു. അവർ പുറത്തുവന്നപ്പോൾ കൈവശം 14 വലിയ കറുത്ത ബാഗുകളുണ്ടായിരുന്നു. ഇതിലായിരുന്നു ആർഡിഎക്സ് സൂക്ഷിച്ച് വച്ചിരുന്നത്. വീട് വാടകയ്ക്കെടുക്കുന്നതിന് മുമ്പ്, താൻ ഒരു ഡോക്ടറാണെന്നും അവിടെ ചില മെഡിക്കൽ ഉപകരണങ്ങൾ സൂക്ഷിക്കുമെന്നും വീട്ടുടമസ്ഥനോട് ആദിൽ പറഞ്ഞു. തുടർന്നാണ് വീട്ടുടമസ്ഥൻ വീട് വാടകയ്ക്ക് നൽകിയത്. എന്നാൽ അവിടെ ആദിൽ ധാരാളം വെടിമരുന്ന് സൂക്ഷിക്കുകയായിരുന്നു, പക്ഷേ വീട്ടുടമസ്ഥൻ ഉൾപ്പെടെ ആരും അതിനെക്കുറിച്ച് അറിഞ്ഞിരുന്നില്ല.
ജെയ്ഷെ മുഹമ്മദിന്റെ അംഗമായ ഡോ. ആദിലിന്റെ ശൃംഖലയുടെ വ്യാപ്തി സുരക്ഷാ ഏജൻസികളും പോലീസും ഇപ്പോൾ അന്വേഷിച്ചുവരികയാണ്. ഇത്രയും വലിയ അളവിൽ ആർഡിഎക്സും എകെ-47 ഉം അയാൾക്ക് എവിടെ നിന്നാണ് ലഭിച്ചതെന്ന് ഇനിയും കണ്ടെത്തേണ്ടിയിരിക്കുന്നു. ഡോ. ആദിലിന്റെ ചോദ്യം ചെയ്യലിനും അന്വേഷണത്തിനും ശേഷം ഈ ഗൂഢാലോചനയുമായി ബന്ധമുള്ള നിരവധി വ്യക്തികളെ അറസ്റ്റ് ചെയ്യാൻ സാധ്യതയുണ്ടെന്ന് വൃത്തങ്ങൾ പറയുന്നു.
ജമ്മു കശ്മീരിലെ അനന്ത്നാഗിൽ നിന്നുള്ളയാളാണ് ഡോ. ആദിൽ എന്ന് പോലീസ് പറഞ്ഞു. എംബിബിഎസ് പൂർത്തിയാക്കിയ ശേഷം ഉത്തർപ്രദേശിലെ സഹാറൻപൂരിലെ ഒരു സ്വകാര്യ ആശുപത്രിയിൽ ജോലിക്ക് ചേർന്നു. അന്നുമുതൽ അദ്ദേഹം അവിടെ ജോലി ചെയ്തു വരികയായിരുന്നു. സംശയാസ്പദമായ പ്രവർത്തനങ്ങളെ തുടർന്ന്, സഹാറൻപൂർ പോലീസിന്റെ സഹായത്തോടെ ശ്രീനഗർ പോലീസ് ഏതാനും ദിവസങ്ങൾക്ക് മുമ്പ് ഇയാളെ അറസ്റ്റ് ചെയ്തത്. അറസ്റ്റ് ചെയ്ത സമയത്ത് അനന്ത്നാഗിലെ വീട്ടിൽ നിന്ന് ഒരു എകെ-47 തോക്കും പോലീസ് കണ്ടെടുത്തിരുന്നു.
