കൊച്ചി: അഞ്ചാമത് ദേശീയ മറൈന്‍ ഫിഷറീസ് സെന്‍സസിന്റെ പ്രധാന ഭാഗമായ ഭവനതല വിവരശേഖരണത്തിന്റെ ഔദ്യോഗിക ലോഞ്ചിങ് നാളെ കേന്ദ്ര സമുദ്രമത്സ്യ ഗവേഷണ സ്ഥാപനത്തില്‍ (സിഎംഎഫ്ആര്‍ഐ) നടക്കും. ലോഞ്ചിങും ദേശീയ ശില്‍പശാലയുടെ ഉദ്ഘാടനവും രാവിലെ 10ന് കേന്ദ്രമന്ത്രി ജോര്‍ജ് കുര്യന്‍ നിര്‍വഹിക്കും. രാജ്യത്തെ തീരദേശ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 12 ലക്ഷത്തിലധികം മത്സ്യത്തൊഴിലാളി വീടുകളില്‍ നിന്ന് വിവരങ്ങള്‍ ശേഖരിക്കും.
മറൈന്‍ സെന്‍സസിന്റെ സാമ്പത്തിക ചിലവ് വഹിക്കുന്നതും ഏകോപന ചുമതല നിര്‍വഹിക്കുന്നതും കേന്ദ്ര ഫിഷറീസ് വകുപ്പാണ്. നടപ്പാക്കുന്നതിനുള്ള നോഡല്‍ ഏജന്‍സിയാണ് സിഎംഎഫ്ആര്‍ഐ. ഫിഷറി സര്‍വേ ഓഫ് ഇന്ത്യ (എഫ്എസ്ഐ) നടത്തിപ്പ് പങ്കാളിയാണ്. മത്സ്യത്തൊഴിലാളി വിഭാഗത്തില്‍ നിന്ന് തെരഞ്ഞെടുക്കപ്പെട്ട എന്യൂമറേറ്റര്‍മാര്‍ 45 ദിവസം നീണ്ടുനില്‍ക്കുന്ന വിവരശേഖരണത്തിനായി ഓരോ മത്സ്യത്തൊഴിലാളി ഭവനത്തിലും നേരിട്ടെത്തും.
അഞ്ച് വര്‍ഷത്തിലൊരിക്കല്‍ സിഎംഎഫ്ആര്‍ഐയുടെ നേതൃത്വത്തില്‍ നടത്തുന്ന മറൈന്‍ സെന്‍സസ് ഇത്തവണ പൂര്‍ണമായും ഡിജിറ്റല്‍ രൂപത്തിലാണ് നടപ്പിലാക്കുന്നത്. വിവരശേഖരണത്തിനായി മൊബൈല്‍-ഡിജിറ്റല്‍ ആപ്പുകളാണ് ഉപയോഗിക്കുന്നത്. സിഎംഎഫ്ആര്‍ഐ വികസിപ്പിച്ച ‘വ്യാസ്-ഭാരത്’, ‘വ്യാസ്-സൂത്ര’ എന്നീ പ്രത്യേക മൊബൈല്‍, ടാബ്ലെറ്റ് ആപ്ലിക്കേഷനുകളും ചടങ്ങില്‍ പുറത്തിറക്കും.
ചടങ്ങിനോടനുബന്ധിച്ച്, സിഎംഎഫ്ആര്‍ഐയില്‍ സജ്ജീകരിച്ച നാഷണല്‍ മറൈന്‍ ഫിഷറീസ് സെന്‍സസ് ഡേറ്റ സെന്ററും കേന്ദ്രമന്ത്രി ഉദ്ഘാടനം ചെയ്യും. ഫിഷറീസ് മന്ത്രാലയത്തിന്റെ സാമ്പത്തിക ഉപദേഷ്ടാവ് ഡോ. അജയ് ശ്രീവാസ്തവ അധ്യക്ഷനാകും. ഹൈബി ഈഡന്‍ എംപി, ടി.ജെ. വിനോദ് എംഎല്‍എ, കേന്ദ്ര ഫിഷറീസ് സെക്രട്ടറി ഡോ. അഭിലക്ഷ് ലിഖി, സിഎംഎഫ്ആര്‍ഐ ഡയറക്ടര്‍ ഡോ. ഗ്രിന്‍സണ്‍ ജോര്‍ജ്, സിഐഎഫ്ടി ഡയറക്ടര്‍ ഡോ. ജോര്‍ജ് നൈനാന്‍, എഫ്എസ്ഐ ഡയറക്ടര്‍ ജനറല്‍ ഡോ. ശ്രീനാഥ് കെ.ആര്‍. തുടങ്ങിയവര്‍ ചടങ്ങില്‍ സംസാരിക്കും.
