കൊച്ചി: മനോനില തെറ്റിയ കൊലക്കേസില് പ്രതിയായ യുവാവിന്റെ ഒരു കണ്ണ് കുത്തിപ്പൊട്ടിച്ച് വഴിയില് തള്ളിയ സംഭവത്തില് പാസ്റ്റര് ഉള്പ്പെടെ മൂന്ന് പേര് പിടിയില്. വരാപ്പുഴ കൂനമ്മാവിലെ അഗതി മന്ദിരം നടത്തിപ്പുകാരായ പാസ്റ്റര് ഫ്രാന്സിസ് (65), ആരോമല്, നിതിന് എന്നിവരാണ് പൊലീസിന്റെ പിടിയിലായത്. ആലപ്പുഴ അരൂര് സ്വദേശി മഞ്ഞന്ത്ര സുദര്ശനനെ (42) ആണ് ഈ മാസം 21ന് രാവിലെ കൊടുങ്ങല്ലൂര് പണിക്കേഴ്സ് ഹാളിനു സമീപം മാരക പരിക്കേറ്റ നിലയില് കണ്ടെത്തിയത്. ഇയാള് തൃശൂര് മെഡിക്കല് കോളജ് ആശുപത്രിയില് വെന്റിലേറ്ററില് ചികിത്സയിലാണ്. പ്രതികള്ക്കെതിരെ കൊലപാതകശ്രമത്തിന് പൊലീസ് കേസെടുത്തു.
വഴിയാത്രക്കാരെ ശല്യപ്പെടുത്തിയതിന് കൊച്ചി സെന്ട്രല് പൊലീസ് കസ്റ്റഡിയിലെടുത്തപ്പോള് മനോനില ശരിയല്ലെന്ന് കണ്ട് അഗതിമന്ദിരത്തിലാക്കിയ വ്യക്തിയാണ് സുദര്ശന്. ഇവിടെ വച്ച് അന്തേവാസികള് തമ്മില് തര്ക്കമുണ്ടായപ്പോള് അഗതിമന്ദിരം നടത്തിപ്പുകാര് സുദര്ശനെ ക്രൂരമായി മര്ദിക്കുകയായിരുന്നു എന്നാണ് പൊലീസ് പറയുന്നത്. ഇയാളുടെ ശരീരത്തില് കത്തി കൊണ്ട് വരഞ്ഞ പാടുണ്ട്. ഒരു കണ്ണ് കുത്തിപ്പൊട്ടിച്ച ശേഷം കൊടുങ്ങല്ലൂരില് വഴിയരികില് തള്ളുകയായിരുന്നു. സിസിടിവി ദൃശ്യങ്ങള് പരിശോധിച്ചതില് നിന്നാണ് പൊലീസിന് തുമ്പ് ലഭിക്കുന്നത്. സുദര്ശനെ വഴിയരികില് തള്ളിയ സ്ഥലത്തു കൂടി കടന്നു പോകുന്ന അഗതി മന്ദിരത്തിന്റെ വാഹനത്തിന്റെ ദൃശ്യങ്ങള് കിട്ടി. തുടര്ന്ന് മറ്റ് സിസിടിവി ദൃശ്യങ്ങളും പരിശോധിച്ചതോടെ ഇവരാണ് സുദര്ശനെ കൊണ്ടുവന്നു തള്ളിയതെന്ന് പൊലീസിന് വ്യക്തമായി.
അരൂരില് താമസിച്ചിരുന്ന സുദര്ശനന് ഏതാനും മാസങ്ങളായി കുത്തിയതോടാണ് താമസം. അതിര്ത്തി തര്ക്കത്തെ തുടര്ന്ന് ചേര്ത്തലയില് മുനീര് എന്നയാളെ കൊലപ്പെടുത്തിയ കേസിലെ പ്രതിയാണ് സുദര്ശനന്. ഈ കേസില് ജാമ്യത്തിലിറങ്ങിയ ശേഷം കൊച്ചിയില് ലഹരി വിമുക്ത കേന്ദ്രത്തില് ചികിത്സ നടത്തിയിരുന്നു.
