ന്യൂദൽഹി: രാജ്യത്തെ പരസ്യ ചിത്രങ്ങളുടെ ഇതിഹാസ നിർമ്മാതാവ് പിയൂഷ് പാണ്ഡെ അന്തരിച്ചു. ഫെവിക്കോൾ, കാഡ്ബറി, ഏഷ്യൻ പെയിന്റ്സ് എന്നിവയുടെ ഐക്കണിക് പരസ്യങ്ങൾക്ക് പിന്നിലെ വ്യക്തിയായിരുന്നു അദ്ദേഹം. 70 വയസ്സായിരുന്നു. ഏറെ നാളായി അദ്ദേഹം രോഗബാധയെ തുടർന്ന് ചികിത്സയിലായിരുന്നു. അദ്ദേഹത്തിന്റെ സംസ്കാര ചടങ്ങുകൾ രാവിലെ 11 മണിക്ക് മുംബൈയിലെ ശിവാജി പാർക്കിൽ നടക്കുമെന്ന് ബന്ധുക്കൾ അറിയിച്ചു.
പിയൂഷ് പാണ്ഡെ ഏകദേശം നാല് പതിറ്റാണ്ടായി പരസ്യ മേഖലയിൽ പ്രവർത്തിച്ച് വന്നിരുന്നു. നിലവിൽ ഓഗിൽവിയുടെ വേൾഡ്വൈഡ് ചീഫ് ക്രിയേറ്റീവ് ഓഫീസറും ഇന്ത്യയുടെ എക്സിക്യൂട്ടീവ് ചെയർമാനുമായിരുന്നു അദ്ദേഹം. 1982ലാണ് പാണ്ഡെ ഓഗിൽവിയിൽ ചേർന്നത്. സൺലൈറ്റ് ഡിറ്റർജന്റിനായിട്ടാണ് അദ്ദേഹം തന്റെ ആദ്യ പരസ്യം എഴുതിയത്.
ആറ് വർഷത്തിന് ശേഷം കമ്പനിയുടെ ക്രിയേറ്റീവ് വിഭാഗത്തിൽ പ്രവേശിച്ച അദ്ദേഹം ഫെവിക്കോൾ, കാഡ്ബറി, ഏഷ്യൻ പെയിന്റ്സ്, ലൂണ മോപെഡ്, ഫോർച്യൂൺ ഓയിൽ, മറ്റ് നിരവധി ബ്രാൻഡുകൾ എന്നിവയ്ക്കായി ശ്രദ്ധേയമായ പരസ്യങ്ങൾ സൃഷ്ടിച്ചു. അദ്ദേഹത്തിന്റെ പ്രവർത്തന മേഖലയിലെ വിജയത്തിന് 2016 ൽ പത്മശ്രീ ആദരവ് ലഭിച്ചത് ഉൾപ്പെടെ നിരവധി അവാർഡുകൾ പാണ്ഡെ ഇതിനോടകം നേടിയിട്ടുണ്ട്.
