ലാഹോർ: ജയിലിൽ കഴിയുന്ന പാകിസ്ഥാൻ മുൻ പ്രധാനമന്ത്രിയും തെഹ്രീക്-ഇ-ഇൻസാഫ് (പിടിഐ) നേതാവുമായ ഇമ്രാൻ ഖാൻ വീണ്ടും പാക് സൈന്യത്തിനെതിരെ രൂക്ഷ വിമർശനം ഉന്നയിച്ചു. സൈനിക മേധാവി ജനറൽ അസിം മുനീർ പാകിസ്ഥാനിലെ ഭരണഘടനാ ക്രമത്തെ ബലപ്രയോഗത്തിലൂടെ തകർത്തുവെന്ന് ഇമ്രാൻ ഖാൻ പറഞ്ഞു.
അസിം മുനീർ ജനാധിപത്യത്തെ ദുർബലപ്പെടുത്തിയെന്നും മുൻ പ്രധാനമന്ത്രി കുറ്റപ്പെടുത്തി. “ഭരണഘടന, നിയമവാഴ്ച, നീതി, ജനാധിപത്യ സ്വാതന്ത്ര്യങ്ങൾ എന്നിവ പരമപ്രധാനമായ ഒരു ജനാധിപത്യ രാജ്യമാണ്. എന്നാൽ ജനറൽ അസിം മുനീറിന്റെ ‘ജനാധിപത്യ രാജ്യം’ ഇവയെല്ലാം തകർക്കപ്പെടുകയും ‘അസിം നിയമം’ നടപ്പിലാക്കപ്പെടുകയും ചെയ്ത ഒന്നാണ്,” – ബുധനാഴ്ച എക്സിൽ ഖാൻ പോസ്റ്റ് ചെയ്തു. മുനീർ ജനാധിപത്യത്തെ കൊലപ്പെടുത്തിയെന്ന് അദ്ദേഹം പറഞ്ഞു.
കൂടാതെ പാകിസ്ഥാനിൽ നടക്കുന്നത് ജനാധിപത്യത്തിന്റെ വേരുകൾ മുറിക്കാനുള്ള ഗൂഢാലോചനയാണെന്ന് അദ്ദേഹം പറഞ്ഞു. ജനങ്ങളുടെ പിന്തുണയും സമ്മതവുമില്ലാതെ ഒരു രാജ്യത്തിനും ശക്തമാകാൻ കഴിയില്ലെന്ന് ഖാൻ പറഞ്ഞു. അതിക്രമങ്ങൾ നടക്കുന്ന പരിധിയില്ലാത്ത നിയമം എന്ന് വിളിക്കപ്പെടുന്നത് രാജ്യത്തിന്റെ അടിത്തറയെ ശക്തിപ്പെടുത്തുകയല്ല, മറിച്ച് അതിനെ ദുർബലപ്പെടുത്തുകയാണെന്നും അദ്ദേഹം പറഞ്ഞു. 73 കാരനായ ഇമ്രാൻ ഖാൻ വിവിധ കുറ്റങ്ങളിൽപ്പെട്ട് രണ്ട് വർഷത്തിലേറെയായി ജയിലിലാണ്.
