ബെംഗളൂരു: ബെംഗളൂരുവിലെ ഒലാ ജീവനക്കാരനായ അരവിന്ദ് ആത്മഹത്യ ചെയ്ത സംഭവത്തില് ഒലാ ഇലക്ട്രിക്ക് സിഇഒ ഭവിഷ് അഗര്വാള്, സുബ്രത കുമാര് ദാസ് എന്നിവര്ക്കെതിരെ ആത്മഹത്യ പ്രേരണാക്കുറ്റം ചുമത്തി കേസെടുത്തു.
ഒലാ ഇലക്ട്രിക്കില് ഹോമോലോഗേഷന് എന്ജിനീയറായ കെ. അരവിന്ദ് സപ്തംബര് 28ന് വിഷം കഴിച്ചു മരിച്ചു എന്നതിന് പോലീസ് അസ്വാഭാവിക മരണത്തിന് കേസെടുത്തു, എന്നാല് അരവിന്ദ് മരണപ്പെട്ടതിന്റെ ഒരു ദിവസം മുന്പ് 17.56 ലക്ഷം രൂപ അദ്ദേഹത്തിന്റെ അക്കൗണ്ടിലേക്ക് ട്രാന്സ്ഫര് ചെയ്തപ്പോള് സംശയം ഉയര്ന്നു. തുടര്ന്ന് കമ്പനിയുടെ എച്ച് ആറിനെ ചോദ്യം ചെയ്തതിനെത്തുടര്ന്ന് അവ്യക്തമായ വിവരങ്ങള് ലഭിച്ചത് അരവിന്ദിന്റെ കുടുംബത്തിന് സംശയം ഉയര്ന്നതായും റിപ്പോര്ട്ടുണ്ട്. അരവിന്ദിന്റെ മുറിയില് പരിശോധന നടത്തിയശേഷം ലഭിച്ച 28 പേജുള്ള ആത്മഹത്യാക്കുറിപ്പില് സുബ്രത കുമാറില്നിന്നും ഭവിഷ് അഗര്വാളില്നിന്നും മാനസിക പീഡനവും ജോലി സമ്മര്ദവും ഉള്ളതായും അവയാണ് ആത്മഹത്യയിലേക്ക് നയിച്ചതെന്നും ചൂണ്ടിക്കാണിക്കുന്നു.
ആത്മഹത്യാക്കുറിപ്പിനെ തുടര്ന്ന് അരവിന്ദിന്റെ കുടുംബം നല്കിയ പരാതിയുടെ അടിസ്ഥാനത്തില് സുബ്രഹ്മണ്യപുരം പോലീസ് സ്റ്റേഷനില് ബിഎന്എസ് സെക്ഷന് 108, 3(5) പ്രകാരം പോലീസ് കേസ് രജിസ്റ്റര് ചെയ്തു. എഫ്ഐആറില് സുബ്രത കുമാര്, ഭവിഷ് അഗര്വാള്, ഒലാ ഇലക്ട്രിക്ക് കമ്പനി എന്നിവരെ പ്രതികളാക്കി പോലീസ് അന്വേഷണം പുരോഗമിക്കുകയാണ്.
