ന്യൂദല്ഹി: ബ്രസീലിന്റെ ആയുധ ശേഖരത്തിലേക്ക് ഇനി ഭാരതത്തിന്റെ ആകാശ് മിസൈലും. ബ്രസീല് വൈസ് പ്രസിഡന്റ് ജെറാള്ഡോ അല്ക്മിനുമായി ന്യൂദല്ഹിയില് പ്രതിരോധ മന്ത്രി രാജ്നാഥ് സിങ് വിപുലമായ ചര്ച്ചകള് നടത്തിയതിന് ശേഷമാണ് ഭാരതം തദ്ദേശീയമായി വികസിപ്പിച്ച ആകാശ് ഉപരിതല-വ്യോമ മിസൈല് സംവിധാനം ബ്രസീലിന് നല്കാന് തീരുമാനമായത്.
ബ്രസീലിയന് പ്രതിരോധ മന്ത്രി ജോസ് മ്യൂസിയോ മൊണ്ടെയ്റോ ഫില്ഹോയും ചര്ച്ചയില് പങ്കെടുത്തു. സൗഹൃദ രാജ്യങ്ങളിലേക്ക് പ്രതിരോധ സംവിധാനങ്ങള് കയറ്റുമതി ചെയ്യുന്നതിന്റെ ഭാഗമായാണ് ഭാരതത്തിന്റെ ഈ തീരുമാനം. ഭാരതം-ബ്രസീല് തന്ത്രപരമായ പങ്കാളിത്തത്തിന്റെ വിശാലമായ രൂപരേഖകളും അവലോകനം ചെയ്തു.
സൈനിക സഹകരണം, പ്രതിരോധ വ്യാവസായിക സഹകരണം എന്നിവ വികസിപ്പിക്കുന്നതില് ശ്രദ്ധ കേന്ദ്രീകരിച്ച് പ്രതിരോധ സഹകരണവുമായി ബന്ധപ്പെട്ട വിഷയങ്ങളില് ബ്രസീലിയന് മന്ത്രിമാരുമായി ചര്ച്ച നടത്തിയെന്ന് രാജ്നാഥ് സിങ് എക്സില് പോസ്റ്റ് ചെയ്തു.
