തിരുവനന്തപുരം: ശബരിമലയില് നിന്ന് നഷ്ടമായ സ്വര്ണം തിരികെ പിടിക്കണമെന്ന് തിരുവിതാംകൂര് ദേവസ്വം ബോര്ഡ് സര്ക്കാരിനോട് ആവശ്യപ്പെട്ടു. ഹൈക്കോടതി അന്വേഷണത്തില് പൂര്ണ വിശ്വാസമാണെന്നും ബോര്ഡ് . കോടതിയെ വിശ്വസിക്കാത്തവരാണ് സിബിഐ അന്വേഷണം ആവശ്യപ്പെടുന്നതെന്നും ദേവസ്വം ബോര്ഡ് യോഗം.
ഉണ്ണികൃഷ്ണന് പോറ്റിയുടെ ആരോപണം ഗൂഢാലോചനയാണ്. കുറ്റം ചെയ്തവര് ആരായാലും ശിക്ഷിക്കപ്പെടണം. പുകമറ സൃഷ്ടിച്ച് ദേവസ്വം ബോര്ഡ് ക്ഷേത്രങ്ങളെ തകര്ക്കാനുള്ള ശ്രമം അപലപനീയമാണ്. ശബരിമല മാസ്റ്റര് പ്ലാന് യാഥാര്ഥ്യമാക്കാന് ആഗോള അയ്യപ്പ സംഗമത്തില് ഉയര്ന്നുവന്ന നിര്ദ്ദേശങ്ങള് കൂടി പരിഗണിച്ച് തുടര് നടപടികളുമായി ദേവസ്വം ബോര്ഡും കേരള സര്ക്കാരും മുന്നോട്ട് പോകവെ നിലവിലെ വിവാദങ്ങള് ഉയര്ന്നുവന്നത് ഗൂഡാലോചനയാണ്. ദ്വാരപാലക പീഠം കാണാനില്ല എന്ന ആരോപണവുമായി ആഗോള അയ്യപ്പ സംഗമത്തിന് ദിവസങ്ങള്ക്ക് മുമ്പ് ഉണ്ണികൃഷ്ണന് പോറ്റി രംഗത്തെത്തിയത് കൃത്യമായ ഗൂഢാലോചനയുടെ ഭാഗമായാണ്. തുടര്ന്ന് അന്വേഷണത്തില് ഉണ്ണികൃഷ്ണന് പോറ്റിയുടെ സഹോദരിയുടെ വീട്ടില് നിന്ന് ദ്വാരപാലക പീഠങ്ങള് ദേവസ്വം വിജിലന്സ് കണ്ടെത്തി.
ശബരിമലയിലെ ദ്വാരപാലക ശില്പങ്ങളിലെ സ്വര്ണപാളി, ശ്രീകോവിലിന്റെ കട്ടള എന്നിവയുമായി ബന്ധപ്പെട്ട ദേവസ്വം വിജിലന്സ് കണ്ടെത്തലുകള് ഗൗരവമുള്ളതാണ്. ഇത് വിട്ടുവീഴ്ചയില്ലാത്ത നിയമ നടപടികള്ക്ക് വിധേയമാക്കേണ്ടതും നഷ്ടപ്പെട്ടുപോയ സ്വര്ണം കണ്ടെത്തി തിരികെ പിടിക്കേണ്ടതുമാണ്.ഇതുമായി ബന്ധപ്പെട്ട എല്ലാ അന്വേഷണങ്ങളെയും തിരുവിതാംകൂര് ദേവസ്വം ബോര്ഡ് സ്വാഗതം ചെയ്യുന്നു.
ദേവസ്വം ബോര്ഡ് വിജിലന്സ് ആണ് പ്രാഥമിക അന്വേഷണം നടത്തി ഹൈക്കോടതിയില് റിപ്പോര്ട്ട് സമര്പ്പിച്ചത്. ആ റിപ്പോര്ട്ടിന്റെ അടിസ്ഥാനത്തില് ഹൈക്കോടതി നിയോഗിച്ച പ്രത്യേക അന്വേഷണ സംഘം ശക്തമായ അന്വേഷണം നടത്തി വരികയാണ്.ദേവസ്വം വിജിലന്സ് റിപ്പോര്ട്ട് പ്രകാരം സര്വീസില് ഉള്ളവരും വിരമിച്ചവരുമായ ഉദ്യോഗസ്ഥര്ക്കെതിരെ തിരുവിതാംകൂര് ദേവസ്വം ബോര്ഡ് ഇതിനകം ശക്തമായ നടപടി സ്വീകരിച്ചിട്ടുണ്ട്. റിപ്പോര്ട്ട് കണക്കിലെടുത്ത് സംസ്ഥാന പൊലീസ് മേധാവിക്ക് തിരുവിതാംകൂര് ദേവസ്വം ബോര്ഡ് സ്വന്തം നിലയില് പരാതിയും നല്കിയിട്ടുണ്ട്.
