കോഴിക്കോട്: പേരാമ്പ്രയില് ഷാഫി പറമ്പില് എം പിക്ക് പരിക്കേറ്റ സംഘര്ഷത്തിനിടെ പൊലീസുകാര്ക്ക് നേരെ സ്ഫോടക വസ്തു എറിഞ്ഞതിന് കേസെടുത്തു. യുഡിഎഫ് പ്രവര്ത്തകര്ക്കെതിരെയാണ് പേരാമ്പ്ര പൊലീസ് പുതിയ കേസ് രജിസ്റ്റര് ചെയ്തത്.
പേരാമ്പ്ര സംഘര്ഷ ദൃശ്യങ്ങള് പരിശോധിച്ചാണ് പൊലീസ് പുതിയ കേസ് രജിസ്റ്റര് ചെയ്തത്.പൊലീസ് തടഞ്ഞുവെച്ച 700 ഓളം പേരില് നിന്ന് ആരോ ഒരാള് സ്ഫോടക വസ്തു എറിഞ്ഞു. പൊലീസ് ഉദ്യോഗസ്ഥരുടെ ജീവന് അപായപ്പെടുത്തണമെന്നും കൃത്യനിര്വഹണം തടസപ്പെടുത്തണമെന്നും ഉളള ഉദ്ദേശത്തോടെയായിരുന്നു ആക്രമണമെന്നും എഫ്ഐആറില് പറയുന്നു.
നേരത്തേ സ്ഫോടക വസ്തു പൊലീസ് ഉദ്യോഗസ്ഥര്ക്കിടയിലേക്ക് എറിയുന്ന വീഡിയോ ദൃശ്യങ്ങള് പുറത്തു വന്നിരുന്നു. ഉഗ്ര ശബ്ദത്തോടെ പൊട്ടിത്തെറിക്കുകയും ചെയ്തു. ഈ സംഭവത്തിലാണ് യുഡിഎഫ് പ്രവര്ത്തകര്ക്കെതിരെ കേസെടുത്തത്. സ്ഫോടക വസ്തു നിരോധന നിയമ പ്രകാരം രജിസ്റ്റര് ചെയ്ത കേസില്,കലാപശ്രമം, അപായപ്പെടുത്താന് നീക്കം, കൃത്യനിര്വഹണം തടസപ്പെടുത്തി എന്നീ വകുപ്പുകളും ചേര്ത്തിട്ടുണ്ട്.
സംഘര്ഷത്തെ തുടര്ന്ന് ഷാഫി പറമ്പില് എംപി, ഡിസിസി പ്രസിഡന്റ് കെ പ്രവീണ്കുമാര് ഉള്പ്പെടെയുള്ള 9 പേര്ക്കെതിരെയും കണ്ടാല് അറിയാവുന്ന 692 പേര്ക്കെതിരെയും സിപിഎം പ്രവര്ത്തകരായ 504 പേര്ക്കെതിരെയും നേരത്തെ കേസെടുത്തിരുന്നു.
