തിരുവനന്തപുരം: സെക്ഷ്വല് ഹരാസ്മെന്റ് ഓഫ് വിമന് അറ്റ് വര്ക്ക് പ്ളേസ് ആക്ട് 2013 സെക്ഷന് 4 പ്രകാരം പത്തോ അതിലധികമോ ജീവനക്കാര് ജോലി ചെയ്യുന്ന തൊഴിലിടങ്ങളിലെല്ലാം തൊഴിലുടമ രേഖാമൂലമുള്ള ഉത്തരവിലൂടെ ഇന്റേണല് കംപ്ലയിന്റ് കമ്മറ്റി രൂപീകരിക്കണം എന്ന് നിര്ബന്ധമുണ്ട്. കേരളത്തിലെ എല്ലാ സര്ക്കാര്, സ്വകാര്യ സ്ഥാപനങ്ങള് വനിത ശിശു വികസന വകുപ്പിലെ ജീവനക്കാരായ അങ്കണവാടി വര്ക്കര്മാര്, ഐ.സി,ഡി.എസ്, സൂപ്പര്വൈസര്മാര്, ശിശു വികസന പദ്ധതി ഓഫീസര്മാര് എന്നിവര് സന്ദര്ശിച്ച് ഇന്റേണല് കമ്മറ്റി രൂപീകരണ സര്വ്വെ നടത്തിവരുന്നു. നിയമത്തെക്കുറിച്ചുള്ള അജ്ഞതകൊണ്ടോ, നിയമം അവഗണിക്കുന്നതുകൊണ്ടോ നിയമപരമായ നിര്ദ്ദേശങ്ങള് പാലിക്കാത്ത സ്വകാര്യ തൊഴിലുടമകള് ഇതൊരു അറിയിപ്പായി പരിഗണിച്ച് അതിവേഗം നടപടി സ്വീകരിക്കണം. പോഷ് ആക്റ്റ് സെക്ഷന് 4 പ്രകാരം അഭ്യന്തര കമ്മറ്റി രൂപീകരിക്കാന് ബാധ്യതപ്പെട്ട എതെങ്കിലും തൊഴിലുടമ അത് നിര്വ്വഹിക്കുന്നില്ലെങ്കില് 50000 രൂപ വരെ പിഴ ഈടാക്കും. പോഷ് ആക്ട് സര്വ്വെയുമായി വനിത ശിശു വികസന വകുപ്പ് ജീവനക്കാര് ഓരേ സ്ഥാപനങ്ങളിലും സന്ദര്ശനം നടത്തുമ്പോള് അവരോട് മാന്യമായി പെരുമാറുകയും നിര്ദ്ദേശങ്ങള് കൃത്യമായി പാലിക്കുകയും ചെയ്യണമെന്ന് ജില്ല വനിത ശിശു വികസന ഓഫീസര് അറിയിച്ചു.
