മുംബൈ: 174 പേര് കൊല്ലപ്പെടുന്നതിന് കാരണമായ 2008ലെ മുംബൈ ഭീകരാക്രമണത്തില് പാകിസ്ഥാനെ തിരിച്ചടിക്കുന്നതില് നിന്നും അന്നത്തെ കോണ്ഗ്രസ് സര്ക്കാരിനെ തടഞ്ഞ വിദേശരാജ്യം ഏതാണെന്ന് വ്യക്തമാക്കണമെന്ന് മോദി. കഴിഞ്ഞ ആഴ്ച കോണ്ഗ്രസ് നേതാവ് പി. ചിദംബരം ഇതേക്കുറിച്ച് നടത്തിയ വെളിപ്പെടുത്തലുകളെയാണ് കോണ്ഗ്രസിന് പ്രതിക്കൂട്ടിലാക്കാന് മോദി ബുധനാഴ്ച മുംബൈയില് പ്രസംഗിക്കുമ്പോള് ഉപയോഗിച്ചത്.
ഇന്ന് പഹല്ഗാമില് 26 പേരെ കൊലപ്പെടുത്തിയ ഭീകരവാദികളെ പറഞ്ഞയച്ച പാകിസ്ഥാന്റെ വീട്ടില് കയറി നമ്മള് അടിക്കുകയാണ്. ഇന്ത്യയിലെ ഏറ്റവും സജീവമായ നഗരമാണ് മുംബൈ എന്നും അതിനാലാണ് 2008ല് പാക് ഭീകരര് മുംബൈയെ ആക്രമണത്തിന് തെരഞ്ഞെടുത്തതെന്നും മോദി പറഞ്ഞു. നവി മുംബൈ അന്താരാഷ്ട്ര വിമാനത്താവളത്തിന്റെ ഉദ്ഘാടന വേളയിലായിരുന്നു മോദിയുടെ ഈ പ്രസംഗം.
2008ലെ ഭീകരാക്രമണത്തിന് ശേഷം നമ്മുടെ സുരക്ഷാ സേന പാകിസ്ഥാനെ ആക്രമിക്കാന് തയ്യാറായിരുന്നു. പക്ഷെ മറ്റൊരു രാജ്യത്തിന്റെ സമ്മര്ദ്ദം കാരണം അന്നത്തെ കോണ്ഗ്രസ് സര്ക്കാര് പാകിസ്ഥാനെ ആക്രമിക്കുന്നതില് നിന്നും സൈന്യത്തെ തടഞ്ഞു. മുതിര്ന്ന കോണ്ഗ്രസ് നേതാവും അന്നത്തെ ആഭ്യന്തരമന്ത്രിയുമായ വ്യക്തിതന്നെയാണ് ഇക്കാര്യം വെളിപ്പെടുത്തിയത്. അത് ഏത് രാജ്യമാണെന്ന് വെളിപ്പെടുത്താന് അന്നത്തെ ആഭ്യന്തരമന്ത്രിയായ കോണ്ഗ്രസ് നേതാവ് തയ്യാറാകണം.- പരോക്ഷമായി പി.ചിദംബരത്തെ വിമര്ശിച്ച് മോദി പറഞ്ഞു. ഈയിടെ ഒരു അഭിമുഖത്തില് 2008ല് ഇന്ത്യ പാകിസ്ഥാനെ ആക്രമിക്കാതിരുന്നത് ഒരു വിദേശ രാജ്യത്തിന്റെ ഇടപെടല് കാരണമാണെന്ന് പി.ചിദംബരം വെളിപ്പെടുത്തിയിരുന്നു.
