കൊച്ചി: ഈ വര്ഷത്തെ പള്സ് പോളിയോ രോഗപ്രതിരോധ കാമ്പയിന് ഒക്ടോബര് 12 ന് നടക്കും. അഞ്ച് വയസ്സിന് താഴെയുള്ള കുട്ടികള്ക്ക് പോളിയോ തുള്ളിമരുന്ന് നല്കും. സര്ക്കാര് ആശുപത്രികള്, സ്വകാര്യ ആശുപത്രികള്, അങ്കണവാടികള്, കമ്മ്യൂണിറ്റി ഹെല്ത്ത് സെന്ററുകള് എന്നിവിടങ്ങളില് ബൂത്തുകള് പ്രവര്ത്തിക്കും. കൂടാതെ, ബസ് സ്റ്റാന്ഡുകള്, റെയില്വേ സ്റ്റേഷനുകള്, ബോട്ട് ജെട്ടികള്, വിമാനത്താവളം എന്നിവിടങ്ങളില് ട്രാന്സിറ്റ് ബൂത്തുകള് ക്രമീകരിക്കും.
ആളുകള്ക്ക് എത്തിപ്പെടാന് പ്രയാസമുള്ള പ്രദേശങ്ങളിലും കുടിയേറ്റ തൊഴിലാളികള്ക്കുള്ള ക്യാമ്പുകളിലും മൊബൈല് ടീമുകളെ ക്രമീകരിക്കും.
പള്സ് പോളിയോ ദിനത്തില്, അഞ്ച് വയസ്സിന് താഴെയുള്ള എല്ലാ കുട്ടികളെയും അടുത്തുള്ള ബൂത്തില് കൊണ്ടുപോയി പോളിയോ തുള്ളിമരുന്ന് നല്കണം. ഒക്ടോബര് 12 ന് ഏതെങ്കിലും കാരണത്താല് തുള്ളിമരുന്ന് ലഭിക്കാത്തവര്ക്ക്, തുടര്ന്നുള്ള രണ്ട് ദിവസങ്ങളില് ആരോഗ്യ പ്രവര്ത്തകര് വീടുകളില് എത്തി വാക്സിന് നല്കും.
1995-ല് ആരംഭിച്ച പോളിയോ പ്രതിരോധ കുത്തിവയ്പ്പ് ശ്രമങ്ങളുടെ ഫലമായി, 2014 മാര്ച്ച് 27-ന് ഇന്ത്യ പോളിയോ വിമുക്തമായി പ്രഖ്യാപിക്കപ്പെട്ടെങ്കിലും, പാകിസ്ഥാന്, അഫ്ഗാനിസ്ഥാന് തുടങ്ങിയ അയല് രാജ്യങ്ങളില് ഇപ്പോഴും പോളിയോ കേസുകള് റിപ്പോര്ട്ട് ചെയ്യപ്പെടുന്ന സാഹചര്യത്തിലാണ് കാമ്പെയ്ന് തുടരുന്നത്.
