കിളിമാനൂര് : ശബരിമലയുമായി ബന്ധപ്പെട്ട വിവാദ നായകന് ഉണ്ണികൃഷ്ണന് പോറ്റി പുളിമാത്ത് നിവാസികള്ക്ക് വല്ലപ്പോഴും വന്നു പോകുന്ന വിരുന്നുകാരന് മാത്രമാണിപ്പോള് .പുളിമാത്താണ് ഇയാള് പഠിച്ചതും വളര്ന്നതും . ഇന്നലെ പോറ്റിയുടെ അച്ഛന് പരേതനായ നാരായണന് പോറ്റിയുടെ ആണ്ടു ബലിയായിരുന്നു .ഇതുമായി ബന്ധപ്പെട്ട് ഉണ്ണികൃഷ്ണന് പോറ്റി പുളിമാത്ത് സ്കൂളിന് സമീപത്തുള്ള ഭഗവതി വിലാസം മഠത്തില് എത്തി. രണ്ടു ബ്രാഹ്മണര് ചടങ്ങിനെത്തി ബലികര്മ്മങ്ങള് നടത്തി പോയിരുന്നു. വീട്ടിലുണ്ടായിരുന്നിട്ടും മാധ്യമ പ്രവര്ത്തകരെ കാണാന് ഉണ്ണികൃഷ്ണന് പോറ്റി തയ്യാറായിരുന്നില്ല . ഗേറ്റ് അകത്തു നിന്നും പൂട്ടിയ നിലയിലായിരുന്നു.
ദാരു ശില്പങ്ങളുടെ പീഠങ്ങള് ആരാണ് ഉണ്ണികൃഷ്ണന് പോറ്റിക്ക് കൈമാറിയെന്നതും ,അത് എവിടെയെല്ലാം കൊണ്ടുപോയെന്നും , അതില് ദേവസ്വം ബോര്ഡിനുള്ള പങ്കും, ഉണ്ണികൃഷ്ണന് പോറ്റിക്ക് അതിലുള്ള താല്പര്യം എന്തായിരുന്നു എന്നതടക്കം ജനങ്ങളുടെ നിരവധി സംശയങ്ങള്ക്ക് മറുപടി നല്കാന് ബാധ്യസ്ഥനാണ് പോറ്റി. എന്നാല് ഉണ്ണികൃഷ്ണന് പോറ്റിയുടെ മൗനം പരിസര വാസികളെയും നാട്ടുകാരെയും അത്ഭുതപ്പെടുത്തുന്നുണ്ട് . ദേവസ്വം ബോര്ഡുമായി ബന്ധപ്പെട്ട ഉന്നതരെ സംരക്ഷിക്കുന്നതിനുള്ള നീക്കമാണെന്നാണ് നാട്ടുകാര് പറയുന്നത് .
നാട്ടുകാര്ക്ക് നിലവില് ഇയാളെ കുറിച്ച് കൂടതലായി അറിവുകളൊന്നുമില്ല .അച്ഛന് പരേതനായ നാരായണന് പോറ്റി പ്രവാസ ജീവിതം നയിച്ചിരുന്നയാളായിരുന്നെന്നും ,പുളിമാത്ത് ദേവീ ക്ഷേത്രപൂജാരി ആയിരുന്നെന്നും നാട്ടുകാര് പറയുന്നു .സാമ്പത്തികമായി വലിയ ഉന്നതിയിലായിരുന്നില്ലെന്നും , ശബരിമലയില് ഒരു കീഴ്ശാന്തിയുടെ സഹായിയായി ഇയാള് പ്രവര്ത്തിച്ചിരുന്നതായി അറിവുണ്ടെന്നുമാണ് നാട്ടുകാര് പറയുന്നത് .സാമ്പത്തികമായി ഉയര്ന്നതോടെ നാട്ടില് ചിലര്ക്ക് വീട് വച്ചു കൊടുത്തിട്ടുണ്ട്. ബാംഗ്ലൂര് കേന്ദ്രമാക്കി പ്രവര്ത്തിക്കുന്ന ഇയാളെക്കുറിച്ചുള്ള വാര്ത്തകള് നാട്ടുകാര് ഇപ്പോള് അത്ഭുതത്തോടെയാണ് കാണുന്നത്.
ജന്മഭൂമി ഓണ്ലൈന്