ന്യൂദല്ഹി: ജവഹര്ലാല് നെഹ്റു സര്വകലാശാലയിലെ വിജയദശമി ആഘോഷം തടസപ്പെടുത്താന് എസ്എഫ്ഐ അടക്കമുള്ള ഇടത് വിദ്യാര്ത്ഥി സംഘടനകളുടെ ശ്രമം. വ്യാഴാഴ്ച രാത്രി ദുര്ഗാദേവിയുടെ വിഗ്രഹം നിമജ്ജനം ചെയ്യാന് കൊണ്ടുപോകുന്നതിനിടെയാണ് എസ്എഫ്ഐക്കാരടക്കമുള്ളവര് അക്രമം നടത്തിയത്.
വിഗ്രഹ നിമജ്ജന യാത്രക്കുനേരെ കല്ലെറിയുകയും ചെരുപ്പുകള് ഉയര്ത്തിപ്പിടിച്ച് സനാതന ധര്മത്തെ അധിക്ഷേപിക്കുന്ന മുദ്രാവാക്യങ്ങള് വിളിക്കുകയുമായിരുന്നു. യാത്രയില് പങ്കെടുത്ത വിദ്യാര്ത്ഥിനികള് അടക്കമുള്ളവരെ കയ്യേറ്റം ചെയ്തു. സെക്യൂരിറ്റി ജീവനക്കാരും പോലീസും ചേര്ന്ന് യാത്രക്ക് സുരക്ഷയൊരുക്കി.
സര്വകലാശാല കാമ്പസില് വലിയ സംഘര്ഷത്തിനുള്ള നീക്കമാണ് എസ്എഫ്ഐയും മറ്റ് ഇടതുവിദ്യാര്ത്ഥി സംഘടനകളും ചേര്ന്ന് നടത്തിയത്. ആഘോഷം തടസപ്പെടുത്തി അക്രമം അഴിച്ചുവിട്ട് സമാധാനാന്തരീക്ഷം തകര്ക്കാനായിരുന്നു ഇടതുവിദ്യാര്ത്ഥി സംഘടനകളുടെ നീക്കം. എന്നാല് വിജയദശമി ആഘോഷത്തില് പങ്കെടുത്ത എബിവിപി പ്രവര്ത്തകരടക്കമുള്ള നൂറുകണക്കിന് വിദ്യാര്ത്ഥികള് സംയമനം പാലിച്ചതിനാല് വലിയ സംഘര്ഷത്തിലേക്ക് പോയില്ല. എസ്എഫ്ഐ കൂടാതെ ഡിഎസ്എഫ്, ഐസ തുടങ്ങിയ സംഘടനകളില്പ്പെട്ടവരാണ് അക്രമം നടത്തിയത്.
സനാതന ധര്മത്തോടും ആചാരങ്ങളോടുമുള്ള ഇടതു സംഘടനകളുടെ ഇരട്ടത്താപ്പ് വിദ്യാര്ത്ഥികള് തിരിച്ചറിയുമെന്ന് ജെഎന്യു വിദ്യാര്ത്ഥി യൂണിയന് ജോ. സെക്രട്ടറി വൈഭവ് മീണ അഭിപ്രായപ്പെട്ടു.
ഇടതു സംഘടനകളുടെ നീക്കം അപലപനീയവും പ്രതിഷേധാര്ഹവുമാണ്. രാജ്യത്തെ പ്രമുഖ സര്വകലാശാലകളില് നിന്നും തൂത്തെറിയപ്പെടുന്ന ഇടതുവിദ്യാര്ത്ഥി സംഘടനകള് അസഹിഷ്ണുതയും അരാജകത്വവും പടര്ത്താന് ശ്രമിക്കുകയാണെന്നും അദ്ദേഹം കൂട്ടിച്ചേര്ത്തു.
