അക്കൗണ്ടില്‍ ലക്ഷങ്ങളുടെ അഴിമതിപ്പണം, തേക്കടി, വള്ളക്കടവ് റേഞ്ച് ഫോറസ്റ്റ് ഓഫീസര്‍മാരെ സസ്‌പെന്‍ഡു ചെയ്തു

ഇടുക്കി: ഗുരുതരമായ അഴിമതികള്‍ കണ്ടെത്തിയതിനെത്തുടര്‍ന്ന് തേക്കടി, വള്ളക്കടവ് റേഞ്ച് ഫോറസ്റ്റ് ഓഫീസര്‍മാരെ വനംവകുപ്പ് സസ്‌പെന്‍ഡു ചെയ്തു.
തേക്കടി റേഞ്ച് ഫോറസ്റ്റ് ഓഫീസര്‍ കെ.ഇ. സിബി, വള്ളക്കടവ് റേഞ്ച് ഫോറസ്റ്റ് ഓഫീസര്‍ അരുണ്‍ കെ.നായര്‍ എന്നിവരെയാണ് സസ്‌പെന്‍ഡ് ചെയ്തത്. ‘ഓപ്പറേഷന്‍ വനരക്ഷ’ എന്ന പേരില്‍ വിജിലന്‍സ് സംഘം സംസ്ഥാനത്തെ 71 റേഞ്ച് ഫോറസ്റ്റ് ഓഫീസുകളില്‍ മിന്നല്‍ പരിശോധന നടത്തിയിരുന്നു. ഇതിനെത്തുടര്‍ന്ന് ഗുരുതര ക്രമക്കേടുകള്‍ കണ്ടെത്തിയതിനെത്തുടര്‍ന്നാണ് നടപടി.
ഒരു കരാറുകാരന്‍ ജൂണ്‍ മുതല്‍ സെപ്തംബര്‍ വരെ വള്ളക്കടവ് റേഞ്ച് ഓഫീസറുടെയും ബന്ധുക്കളുടെയും ബാങ്ക് അക്കൗണ്ടിലേക്ക് 72.80 ലക്ഷം രൂപ നിക്ഷേപിച്ചതായി വിജിലന്‍സ് കണ്ടെത്തിയിരുന്നു. ഇതേ കരാറുകാരന്‍ തേക്കടി റേഞ്ച് ഫോറസ്റ്റ് ഓഫീസറുടെ അക്കൗണ്ടുകളില്‍ 31.08 ലക്ഷം രൂപയും നിക്ഷേപിച്ചിട്ടുണ്ട്.
തേക്കടി റേഞ്ച് ഓഫീസര്‍ മറ്റു രണ്ടു കരാറുകാരില്‍ നിന്ന് 1.95 ലക്ഷം രൂപ വാങ്ങിയതിന്‌റെ തെളിവുകളും പരിശോധനയില്‍ കണ്ടെത്തി. ലാന്‍ഡ് എന്‍ഒസി, മരംമുറി തുടങ്ങിയവയുമായി ബന്ധപ്പെട്ടാണ് വന്‍ ക്രമക്കേടുകള്‍ കണ്ടെത്തിയത്.