ചെന്നൈ: കരൂരില് പൊതുയോഗത്തിനിടെ തിക്കിലും തിരക്കിലും പെട്ട് 41 പേര് മരിക്കാനിടയാക്കിയ ദുരന്തത്തില് നടന് വിജയിനെ കുറ്റപ്പെടുത്തി പൊലീസ് കേസെടുത്തു. ആളുകളുടെ മരണത്തിനിടയാക്കിയ തിക്കിനും തിരക്കിനും കാരണം വിജയ് പ്രതീക്ഷിച്ചതിലും നേരം വൈകി എത്തിയത് മൂലമാണെന്നതാണ് ഒരു കുറ്റപ്പെടുത്തല്. പൊലീസ് അനുമതിയില്ലാതെ റോഡ് ഷോ നടത്തിയെന്നതാണ് രണ്ടാമത്തെ കുറ്റം.
വിജയിന്റെ പാര്ട്ടിയായ തമിഴ് വെട്രി കഴകം (ടിവിസി) ജില്ലാ സെക്രട്ടറി മതിയഴകന് 10,000 പേര് പങ്കെടുക്കുന്ന റാലിയ്ക്കാണ് അനുമതി തേടിയിരുന്നത്. നടന് വിജയ് എത്തുമെന്നറിഞ്ഞതോടെ 25000 പേരോളം തടിച്ചുകൂടി. കൂടുതല് ആളുകള് എത്തിച്ചേരാന് വേണ്ടി വിജയുടെ വരവ് സംഘാടകര് പരമാവധി വൈകിക്കുകയായിരുന്നു.
കരൂരിലെ പരിപാടിക്ക് നാല് മണിക്കൂര് വൈകിയാണ് വിജയ് എത്തിയത്. ഇത് യോഗത്തിലെ ജനപങ്കാളിത്തം കാണിക്കുന്നതിനുള്ള ആസൂത്രണത്തിന്റെ ഭാഗമായിട്ടായിരുന്നു. ഇത് കാരണമാണ് തിക്കിലും തിരക്കിലും ഇത്രയും പേര് മരിക്കാനിടയായത്. – പൊലീസ് എഫ് ഐആറില് പറയുന്നു.
വിജയ് വാസ്തവത്തില് 4.45ന് തന്നെ വേലായുധപാളയത്തില് എത്തിയിരുന്നു. പക്ഷെ വേദിയിലേക്കെത്താന് അനുമതിയില്ലാതെ ഒരു റോഡ് ഷോ സംഘടിപ്പിച്ചു. ഇതോടെ വിജയ് വേദിയിലേക്ക് ഏഴ് മണിക്ക് എത്തിച്ചേരുമ്പോഴേക്കും നിയന്ത്രിക്കാവുന്നതിലും അധികം ആരാധകര് തടിച്ചുകൂടിക്കഴിഞ്ഞിരുന്നു. – പൊലീസ് എഫ് ഐ ആര് കുറ്റപ്പെടുത്തുന്നു.
