കണ്ണൂര്: മട്ടന്നൂരിലെ ജനവാസ മേഖലയില് ഭീതി പരത്തിയ കാട്ടുപോത്തിനെ വനംവകുപ്പ് മയക്കുവെടി വച്ച് പിടികൂടി. കൂടാളി ചിത്രാരിയില് വച്ചാണ് ഉച്ചയോടെ മയക്കുവെടി വച്ചത്.
വ്യാഴാഴ്ച രാത്രിയാണ് കിളിയങ്ങാട്ട് കാട്ടുപോത്തിനെ ആദ്യം കണ്ടത്. കിളിയങ്ങാട് മേറ്റടി റോഡിലൂടെ നീങ്ങിയ കാട്ടുപോത്ത് പിന്നീട് വെള്ളിയാംപറമ്പിലെ കിന്ഫ്ര പാര്ക്കിനായി ഏറ്റെടുത്ത സ്ഥലത്ത് നിലയുറപ്പിച്ചു.
കാട്ടുപോത്ത് ജനവാസ മേഖലയില് ചുറ്റിത്തിരിഞ്ഞതിനാല് കീഴല്ലൂര് പഞ്ചായത്തിലെ ആറ്, ഏഴ് വാര്ഡുകളില് നിരോധനാജ്ഞ പ്രഖ്യാപിച്ചിരുന്നു. കാട്ടുപോത്തിനെ തുരത്താന് സമീപ പ്രദേശങ്ങളില് വനമില്ലാത്തതിനാല് ചീഫ് വൈല്ഡ് ലൈഫ് വാര്ഡന്റെ അനുമതിയോടെ മയക്കുവെടി വച്ച് പിടികൂടാന് തീരുമാനിക്കുകയായിരുന്നു. വെള്ളിയാഴ്ച വൈകിട്ട് തന്നെ മയക്കുവെടി വയ്ക്കാനുള്ള ഒരുക്കങ്ങള് നടത്തിയിരുന്നെങ്കിലും രാത്രിയായതോടെ ശ്രമം ഉപേക്ഷിച്ചു.
വെറ്ററിനറി ഡോക്ടര് ഇല്യാസിന്റെ നേതൃത്വത്തിലുള്ള സംഘമാണ് കാട്ടുപോത്തിനെ മയക്കുവെടി വച്ച് പിടികൂടിയത്. വനംവകുപ്പ് ഉദ്യോഗസ്ഥരും വെറ്ററിനറി സര്ജനും സ്ഥലത്ത് ഉണ്ടായിരുന്നു.
