കോഴിക്കോട്: പെണ്കുട്ടികള് പുറത്തുപോയ സമയം ഹോസ്റ്റല് ഉടമ സ്ഥാപനം പൂട്ടി കടന്നുകളഞ്ഞെന്ന് പരാതി. കോഴിക്കോട് ചാലപ്പുറത്താണ് ഒരുകൂട്ടം പെണ്കുട്ടികളെ പെരുവഴയിലാക്കിയത്. രാവിലെ തങ്ങള് ജോലി സ്ഥലത്തേക്കും പഠിക്കാനും പോയ സമയത്ത് ഉടമ സ്ഥാപനം പൂട്ടിപ്പോവുകയായിരുന്നുവെന്ന് പെണ്കുട്ടികള് പറഞ്ഞു.
വീടിന്റെ ഉടമസ്ഥനില് നിന്നും കെട്ടിടം വാടകയ്ക്കെടുത്തയാള് മറ്റൊരു യുവതിക്ക് ഹോസ്റ്റല് നടത്താനായി കൈമാറിയിരുന്നു എന്നാണ് വിവരം. എന്നാല് ഈ യുവതി താമസക്കാരെ പറഞ്ഞു പറ്റിക്കുകയായിരുന്നുവെന്ന് കസബ പൊലീസ് അറിയിച്ചു.രാവിലെ പുറത്ത് പോയവര് വൈകിട്ടോടെ തിരിച്ചെത്തിയപ്പോഴാണ് താമസ സ്ഥലം പൂട്ടിയിരിക്കുന്നതായി കണ്ടത്. വസ്ത്രങ്ങള് ഉള്പ്പെടെഎല്ലാ സാധനങ്ങളും വീട്ടിനകത്തായതിനാല് ഇവര്ക്ക് വസ്ത്രം മാറാനും സാധിച്ചില്ല. ഒടുവില് രാത്രി കാളൂര് റോഡിലെ മറ്റൊരു ഹോസ്റ്റലില് ഇവരെ താല്ക്കാലികമായി താമസിപ്പിക്കുകയായിരുന്നു.
അടുത്ത ദിവസം രാത്രി കസബ പൊലീസിന്റെ നേതൃത്വത്തില് ഇവര് താമസിച്ചിരുന്ന വീട് തുറക്കുകയും സാധനങ്ങള് എടുക്കാനുള്ള സൗകര്യം ഒരുക്കുകയും ചെയ്തു. വാടക കൃത്യമായി നല്കിയിരുന്നുവെന്ന് പറഞ്ഞ പെണ്കുട്ടികള് ഹോസ്റ്റല് എന്തുകൊണ്ട് പൂട്ടിയെന്ന് അറിയില്ലെന്നും പ്രതികരിച്ചു.
