തിരുവനന്തപുരം: ദാദാ സാഹേബ് ഫാല്ക്കെ പുരസ്കാര വേദിയില് മോഹന്ലാലിന്റെ പ്രസംഗത്തിലെ വരികളെക്കുറിച്ച് വേവലാതി വേണ്ടെന്ന് ഉന്നതവിദ്യാഭ്യാസ മന്ത്രി ഡോ.ആര് ബിന്ദു. രണ്ടു വരികളുടെ അടിസ്ഥാനത്തില് അദ്ദേഹത്തെ വിലയിരുത്തേണ്ടതില്ല. വരികള് അല്ല പ്രസംഗത്തിന്റെ ആകെത്തുകയാണ് നോക്കേണ്ടതെന്ന് മന്ത്രി പറഞ്ഞു.
അതിനിടെ, ആജീവനാന്ത സംഭാവനയ്ക്കുള്ള വയോസേവന അവാര്ഡുകള് മന്ത്രി പ്രഖ്യാപിച്ചു. നടി ഷീല, ഗായിക പി കെ മേദിനി എന്നിവര്ക്കാണ് പുരസ്കാരം.ഒരു ലക്ഷം രൂപയാണ് പുരസ്കാര തുക.
കോട്ടയം മെഡിക്കല് കോളേജിലെ കെട്ടിടം ഇടിഞ്ഞു വീണ് മരിച്ച ബിന്ദുവിന് വീട് ഒരുങ്ങിയതായി മന്ത്രി അറിയിച്ചു. 12 ലക്ഷം രൂപ ചെലവിട്ട് നാഷണല് സര്വീസ് സ്കീം ആണ് വീട് ഒരുക്കിയത്. വീടിന്റെ താക്കോല് ദാനം വെളളിയാഴ്ച നടക്കും. സര്വകലാശാല ബില്ല് എന്തുകൊണ്ടാണ് ഗവര്ണര് ഒപ്പിടാതെ പ്രസിഡന്റിന് അയച്ചതെന്ന് അറിയില്ലെന്ന് മന്ത്രി പ്രതികരിച്ചു.
ബില്ല് അവതരിപ്പിക്കുക കടമയാണ്. ചില വിസിമാര് ഏകാധിപതികളെ പോലെ പെരുമാറുന്നതു കൊണ്ട് കൂടിയാണ് ബില് കൊണ്ടുവന്നതെന്നും മന്ത്രി പറഞ്ഞു.
