തിരുവനന്തപുരം: എച്ച്എംടിയുടെ കൈവശമുള്ള 27 ഏക്കര് ഭൂമി ഏറ്റെടുത്ത് കളമശ്ശേരിയില് ജുഡീഷ്യല് സിറ്റി സ്ഥാപിക്കുന്നതിന് തത്വത്തില് അനുമതി നല്കി മന്ത്രിസഭാ യോഗം. പദ്ധതി നടപ്പാക്കുന്നതിനാവശ്യമായ പ്രാരംഭ നടപടികള് ആരംഭിക്കുന്നതിനും കേന്ദ്ര സഹായം ലഭിക്കുന്നതിനുള്ള സാധ്യത പരിശോധിക്കുന്നതിനും ആഭ്യന്തര വകുപ്പിനെ ചുമതലപ്പെടുത്തി.ഹൈക്കോടതി ഉള്പ്പെടുന്ന ജുഡീഷ്യല് സിറ്റിയുടെ പ്രാഥമിക രൂപരേഖ പൊതുമരാമത്ത് വകുപ്പ് തയ്യാറാക്കിയിട്ടുണ്ട്. 27 ഏക്കര് ഭൂമിയിലായി 12 ലക്ഷത്തിലധികം ചതുരശ്ര അടി കെട്ടിട സൗകര്യമുള്പ്പെടെ രാജ്യാന്തര തലത്തിലുള്ള ആധുനിക സംവിധാനങ്ങളും സൗകര്യങ്ങളും ജുഡീഷ്യല് സിറ്റിയില് ഉണ്ടാകും. മൂന്ന് ടവറുകളിലായാണ് ജൂഡീഷ്യല് സിറ്റി രൂപകല്പന ചെയ്തിരിക്കുന്നത്. പ്രധാന ടവറില് 7 നിലകളും മറ്റ് രണ്ട് ടവറുകളില് 6 നിലകള് വീതവും ഉണ്ടാകും.
ഹൈക്കോടതി ജഡ്ജിമാരായ ജസ്റ്റിസ് മുഹമ്മദ് മുഷ്താഖ്, ജസ്റ്റിസ് ബെച്ചു കുര്യന് തോമസ്, ജസ്റ്റിസ് രാജ വിജയരാഘവന്, ജസ്റ്റിസ് സതീഷ് നൈനാന് എന്നിവര്ക്കൊപ്പം കളമശ്ശേരിയിലെ സ്ഥലം സന്ദര്ശിച്ച് പദ്ധതിയുടെ വിശദാംശങ്ങള് തയ്യാറാക്കിയിരുന്നു.
