കൊല്ലം: ചട്ടമ്പിസ്വാമികള് ലോകത്തെ ജ്ഞാനശക്തിയാല് പ്രോജ്വലിപ്പിച്ച മഹാത്മാവായിരുന്നുവെന്നും സ്വാമിയുടെ ദര്ശനങ്ങള് പുതിയ തലമുറയെ പഠിപ്പിക്കണമെന്നും വാഴൂര് തീര്ത്ഥപാദാശ്രമം മഠാധിപതി സ്വാമി പ്രജ്ഞാനാനന്ദ തീര്ത്ഥപാദര്. ചട്ടമ്പിസ്വാമികളുടെ 172-ാമത് ജയന്തി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം.
ശാന്തിയുടെ ദൂതനായിരുന്നു സ്വാമികള്. ഹിംസജന്തുക്കള് പോലും സ്വാമിയുടെ അടുത്തെത്തിയപ്പോള് ശാന്തമാകുമായിരുന്നു. ലോകനന്മയ്ക്കായി പ്രവര്ത്തിച്ചവരായിരുന്നു ചട്ടമ്പിസ്വാമികള്, ശ്രീനാരായണഗുരു, നീലകണ്ഠതീര്ത്ഥപാദ സ്വാമികള് എന്നിവര്. സാത്വികരായവരുടെ ഭവനത്തില് പാര്ക്കും. എല്ലാവരുടെയും ആശ്രയകേന്ദ്രവും സ്വാമിയായിരുന്നു. സ്വാമികളുടെ ജന്മോദ്ദേശം മനുഷ്യരെ ഈശ്വരനോളം ഉയര്ത്തുകയായിരുന്നു. ശിവസ്വരൂപിയായിട്ടാണ് സ്വമികള് ഭൗതികശരീരം ഉപേക്ഷിച്ചതെന്നും സ്വാമി പറഞ്ഞു.
പന്മന ആശ്രമം ആചാര്യന് സ്വാമി നിത്യസ്വരൂപാനന്ദ അധ്യക്ഷനായി. ലോകോത്തരമായ ജീവിത സന്ദേശങ്ങളോട് എത്രമാത്രം നമ്മള് കൂറ് പുലര്ത്തിയിട്ടുണ്ടെന്ന് ആത്മപരിശോധന നടത്തണം. സര്വ ജ്ഞാനകലാനിധിയും ബ്രഹ്മവുമായി ചേര്ന്ന് മറഞ്ഞ ആളുമാണ് സ്വാമികളെന്ന് ശ്രീനാരായണ ഗുരുദേവന് പറഞ്ഞിട്ടുണ്ട്. മനുഷ്യന് മനുഷ്യനായി ജീവിക്കണമെങ്കില് മഹാത്മാക്കളുടെ സന്ദേശം ഉള്ക്കൊണ്ട് ജീവിക്കണമെന്നും അദ്ദേഹം പറഞ്ഞു.
ആലത്തൂര് സിദ്ധാശ്രമം മഠാധിപതി സ്വാമി ശിവാനന്ദയോഗി വിശിഷ്ടാതിഥിയായി. പന്മന ആശ്രമം മഠാധിപതി സ്വാമി കൃഷ്ണമയാനന്ദ തീര്ത്ഥപാദര്, കരുനാഗപ്പള്ളി ശ്രീനീലകണ്ഠതീര്ത്ഥപാദാശ്രമം സെക്രട്ടറി പ്രൊഫ. ആര്. അരുണ്കുമാര് എന്നിവര് സംസാരിച്ചു.
ഭരണിനക്ഷത്ര വിശേഷാല് പൂജകള്, പുഷ്പാഭിഷേകം എന്നിവ നടന്നു. കരുനാഗപ്പള്ളി പുതിയകാവ് ശ്രീനീലകണ്ഠ തീര്ത്ഥപാദസ്വാമി ചാരിറ്റബിള് ട്രസ്റ്റിന്റെ നേതൃത്വത്തില് പുതിയകാവ് ഋഷിമണ്ഡപ അങ്കണത്തിലും പുഷ്പാര്ച്ചന സംഘടിപ്പിച്ചു.
