കാഠ്മണ്ഡു: നേപ്പാളില് സംഘര്ഷങ്ങള് തുടരുന്നതിനിടെ ഇടക്കാല പ്രധാനമന്ത്രിയായി കുല്മന് ഘിസിങ് ചുമതലയേല്ക്കും. പ്രധാനമന്ത്രിയായിരുന്ന കെ.പി. ശര്മ ഒലി രാജിവെച്ചതിനെ തുടര്ന്നാണിത്. നേപ്പാള് വൈദ്യുതി ബോര്ഡ് മുന് ചെയര്മാനാണ് ഈ 54 കാരന്.
പ്രധാനമന്ത്രിയും മറ്റ് മന്ത്രിമാരും രാജിവെച്ചൊഴിഞ്ഞതിനെ തുടര്ന്ന് ഇടക്കാല സര്ക്കാര് രൂപീകരണത്തിനായി നേപ്പാളില് തിരക്കിട്ട ചര്ച്ചകള് നടന്നുവരികയാണ്. കാഠ്മണ്ഡു മേയര് ബാലേന്ദ്ര ഷാ, നേപ്പാള് സുപ്രീംകോടതി മുന് ചീഫ് ജസ്റ്റിസ് സുശീല കര്ക്കി എന്നിവരുടെ പേരുകളും പ്രധാനമന്ത്രിസ്ഥാനത്തേക്ക് പരിഗണിക്കപ്പെട്ടിരുന്നെങ്കിലും അവസാനം കുല്മനെ ഏകകണ്ഠമായി തെരഞ്ഞെടുക്കുകയായിരുന്നു.
ബാലേന്ദ്രയുടെ പേരാണ് ജെന് സി പ്രതിഷേധക്കാര് ആദ്യം മുന്നോട്ടുവെച്ചത്. എന്നാല് അദ്ദേഹം പ്രധാനമന്ത്രിപദം ഏറ്റെടുക്കാന് വിസമ്മതിക്കുകയായിരുന്നു. മുന് ചീഫ് ജസ്റ്റിസ് സുശീലയ്ക്ക് വേണ്ടിയും ചര്ച്ചകള് നടന്നെങ്കിലും മുന് ജഡ്ജിമാര് പ്രധാനമന്ത്രിയാകുന്നതിനെ പലരും എതിര്ത്തതോടെ കുല്മനെ നിശ്ചയിക്കുകയായിരുന്നു.
നേപ്പാള് ജനതയെ അലട്ടിക്കൊണ്ടിരുന്ന വൈദ്യുതി പ്രതിസന്ധി പരിഹരിച്ചത് കുല്മനാണ്. അതുകൊണ്ടുതന്നെ യുവാക്കള്ക്കിടയില് അദ്ദേഹത്തിന് വലിയ സ്വീകാര്യതയാണ്. ഇടക്കാല പ്രധാനമന്ത്രിയായി ജെന് സി പ്രതിഷേധക്കാര് കുല്മനെ സ്വാഗതം ചെയ്തിട്ടുണ്ട്. ദേശസ്നേഹി എന്നാണ് അവര് അദ്ദേഹത്തെ വിശേഷിപ്പിച്ചതും.
1970 നവംബര് 25ന് ബേതാനിലാണ് കുല്മന്റെ ജനനം. പ്രാഥമിക വിദ്യാഭ്യാസത്തിന് ശേഷം ഭാരതത്തിലെത്തിയ അദ്ദേഹം ജംഷഡ്പൂരിലെ റീജിയണല് ഇന്സ്റ്റിറ്റ്യൂട്ട് ഓഫ് ടെക്നോളജിയില് നിന്ന് ഇലക്ട്രിക്കല് എന്ജിനീയറിങ്ങില് ബിരുദം കരസ്ഥമാക്കിയതിന് ശേഷമാണ് നേപ്പാള് വൈദ്യുതി ബോര്ഡില് എന്ജിനീയറായി സേവനം ആരംഭിച്ചത്.
