പൊന്കുന്നം: പിണറായി വിജയന് സര്ക്കാര് ജനങ്ങള്ക്ക് വാഗ്ദാനങ്ങള് നല്കുന്നതല്ലാതെ മറ്റൊന്നും ചെയ്യുന്നില്ലെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ഇടതു മുന്നണി സര്ക്കാര് തങ്ങളുടെ പ്രോഗ്രസ് റിപ്പോര്ട്ട് അവതരിപ്പിക്കണമെന്നും അദ്ദേഹം ആവശ്യപ്പെട്ടു. ബിജെപി കോട്ടയം ഈസ്റ്റ് ജില്ലാ കാര്യാലയം ‘ശ്രീധരീയം’ പൊന്കുന്നത്ത് ഉദ്ഘാനം ചെയ്യുകയായിരുന്നു അദ്ദേഹം.
ജനോപകാരപ്രദമായ പദ്ധതികള്ക്ക് കേന്ദ്രം നല്കുന്ന പണം വകമാറ്റി ചെലവഴിക്കുക എന്നതാണ് കേരള സര്ക്കാരിന്റെ മുഖമുദ്ര. യാഥാര്ത്ഥ്യങ്ങളില് നിന്നും ജനശ്രദ്ധ തിരിക്കാനാണ് സിപിഎമ്മും കോണ്ഗ്രസും ശ്രമിക്കുന്നത്. വികസനമെവിടെ എന്ന് ചോദിക്കുമ്പോള്, കേന്ദ്രം കാശ് തന്നില്ല, പെന്ഷന് ചോദിച്ചാല് കേന്ദ്രം കാശ് തന്നില്ല, ആശ വര്ക്കര്മാര് ശമ്പളം ചോദിച്ചാല് കേന്ദ്രം കാശ് തന്നില്ല, എന്നിങ്ങനെ എന്തിനും കേന്ദ്രത്തെ പഴിചാരി ഒളിച്ചോടുകയാണ് പിണറായിയും കൂട്ടരും. സിപിഎമ്മും കോണ്ഗ്രസും വികസനത്തെക്കുറിച്ച് പറയാറില്ല.
നാടിന്റെ സമഗ്ര വികസനമെന്നതാണ് ബിജെപിയുടെ രാഷ്ട്രീയം. എല്ലാവരുടെയും ഒപ്പം എല്ലാവര്ക്കും വേണ്ടി പ്രവര്ത്തിക്കുന്നത് ബിജെപി മാത്രമാണ്. മറ്റ് രണ്ട് കൂട്ടര്ക്കും കപട മുഖമാണുള്ളത്. ജമാഅത്തെ ഇസ്ലാമിക്ക് ഒപ്പം രാഷ്ട്രീയം ചെയ്യുന്ന പാര്ട്ടികളാണ് ബിജെപിയെ വര്ഗീയവാദികളെന്ന് പറയുന്നത്. വരാന് പോകുന്ന ത്രിതല പഞ്ചായത്ത് നിര്ണായകമാണ്. ജനങ്ങളാഗ്രഹിക്കുന്ന മാറ്റം തെരഞ്ഞെടുപ്പോട് കൂടി സഫലമാകും, അദ്ദേഹം കൂട്ടിച്ചേര്ത്തു. ചടങ്ങില് ബിജെപി കോട്ടയം ഈസ്റ്റ് ജില്ലാ പ്രസിഡന്റ് റോയി ചാക്കോ അധ്യക്ഷത വഹിച്ചു.
സംസ്ഥാന ജനറല് സെക്രട്ടറിമാരായ അഡ്വ. എസ്. സുരേഷ്, അനൂപ് ആന്റണി, ദേശീയസമിതി അംഗം പി.സി. ജോര്ജ്, സംസ്ഥാന വൈസ് പ്രസിഡന്റുമാരായ അഡ്വ. പി. സുധീര്, അഡ്വ. ഷോണ് ജോര്ജ്, സംസ്ഥാന സെക്രട്ടറി അശോകന് കുളനട, ദേശീയ ന്യൂനപക്ഷ മോര്ച്ച വൈസ് പ്രസിഡന്റ് അഡ്വ. നോബിള് മാത്യു, ദേശീയ കര്ഷകമോര്ച്ച വൈസ് പ്രസിഡന്റ് അഡ്വ. എസ്. ജയസൂര്യന്, ന്യൂനപക്ഷമോര്ച്ച സംസ്ഥാന പ്രസിഡന്റ് സുമിത് ജോര്ജ്, മുതിര്ന്ന നേതാവ് ഏറ്റുമാനൂര് രാധാകൃഷ്ണന് തുടങ്ങിയവര് പങ്കെടുത്തു.
സ്വര്ഗീയ ശ്രീധരന് നായരുടെ കുടുംബം സമ്മേളനത്തില് പങ്കെടുത്തു. തുടര്ന്ന് അടിയന്തരാവസ്ഥ വിരുദ്ധ പോരാളികളായ നാല്പതോളം പേരെ രാജീവ് ചന്ദ്രശേഖര് ഓണക്കോടി നല്കി ആദരിച്ചു. പുതിയതായി ബിജെപിയില് ചേര്ന്നവര്ക്ക് സ്വീകരണവും നല്കി. പൊന്കുന്നത്ത് സ്വകാര്യ ബസ് സ്റ്റാന്റിന് സമീപം ഡിവൈഎസ്പി ഓഫീസിന് എതിര്വശത്താണ് ബിജെപി കോട്ടയം ഈസ്റ്റ് ജില്ലാ കാര്യാലയം പ്രവര്ത്തിക്കുന്നത്.
