പത്തനംതിട്ട: ഓണത്തോടനുബന്ധിച്ച് വ്യാപാര സ്ഥാപനങ്ങളില് മിന്നല് പരിശോധന നടത്തുമെന്ന് മുന്കൂട്ടി അറിയിച്ച് ജില്ലാ ലീഗല് മെട്രോളജി വകുപ്പ് പരിഹാസ്യരായി. സാധാരണ മുന്കൂട്ടി അറിയിപ്പു നല്കാതെ അപ്രതീക്ഷിതമായി നടത്തുന്നതിനെയാണ് മിന്നല് പരിശോധന എന്ന് വിശേഷിപ്പിച്ചിരുന്നത്. എന്നാല് ഞങ്ങള് വരുന്നുണ്ടേ എല്ലാം മാറ്റിക്കോ എന്നോ തരാനുള്ള കൈമടക്കെടുത്തുവച്ചോ എന്ന് മുന്കൂട്ടി പറയും പോലെയായി ജില്ലാ ലീഗല് മെട്രോളജി വകുപ്പിന്റെ അറിയിപ്പ്. എല്ലാ ദിവസവും സ്ക്വാഡുകള് വിവിധ വ്യാപാര സ്ഥാപനങ്ങളില് പരിശോധന നടത്തുമെന്നാണ് അറിയിപ്പ്. മുദ്രപതിക്കാത്ത അളവ് തൂക്ക ഉപകരണങ്ങള് ഉപയോഗിക്കുക, അളവിലും തൂക്കത്തിലും കുറച്ച് വില്പന നടത്തുക, നിര്മ്മാതാവിന്റെ വിലാസം, ഉല്പന്നം പായ്ക്ക് ചെയ്ത തീയതി, അളവ്, തൂക്കം, പരമാവധി വില്പന വില, പരാതി പരിഹാര നമ്പര് തുടങ്ങിയവ ഇല്ലാത്ത പാക്കറ്റുകള് വില്പന നടത്തുക, എം ആര് പി യെക്കാള് അധിക വില ഈടാക്കുക, വില തിരുത്തുക തുടങ്ങിയ കുറ്റകൃത്യങ്ങള് കണ്ടെത്തി നടപടി സ്വീകരിക്കുമെന്നും അറിയിപ്പില് പറയുന്നു.
