ആലപ്പുഴ : വീയപുരം ചുണ്ടന് (വിബിസി കൈനകരി) 71ാമത് നെഹ്റു ട്രോഫി വള്ളംകളിയില് കപ്പുയര്ത്തി. കഴിഞ്ഞ തവണ ഫൈനലില് മൈക്രോ സെക്കന്ഡിന് തോറ്റതിനുളള മധുര പ്രതികാരമാണ് വീയപുരം ചുണ്ടന് ഈ നേട്ടം. വിബിസിയുടെ മൂന്നാം കിരീടമാണ്. സെക്കന്ഡുകളുടെ വ്യത്യാസത്തില് നടുഭാഗം (പുന്നമട ബോട്ട് ക്ലബ്) രണ്ടാം സ്ഥാനത്ത് ആയി.
മേല്പ്പാടം (പള്ളാതുരുത്തി ബോട്ട് ക്ലബ്) മൂന്നാം സ്ഥാനത്ത് എത്തി.നിരണം (നിരണം ബോട്ട് ക്ലബ്) ആണ് നാലാം സ്ഥാനത്ത്.ഒന്നാം ട്രാക്കില് മേല്പ്പാടം, രണ്ടാം ട്രാക്കില് നിരണം, മൂന്നാം ട്രാക്കില് നടുഭാഗം, നാലാം ട്രാക്കില് വീയപുരം എന്നിങ്ങനെയാണ് ഫൈനലില് അണിനിരന്നത്.
അതേസമയം രണ്ടു ബോട്ട് ക്ലബുകള്ക്കെതിരെ പള്ളാത്തുരുത്തി ബോട്ട് ക്ലബ് പരാതിയുമായി രംഗത്തെത്തി. ഫൈനല് യോഗ്യത നേടിയ നിരണം (നിരണം ബോട്ട് ക്ലബ്), നടുഭാഗം (പുന്നമട ബോട്ട് ക്ലബ്) എന്നീ ചുണ്ടന്വള്ളങ്ങള് 25 ശതമാനം പ്രൊഫഷണല് തുഴച്ചില്ക്കാര് എന്ന നിയമം ലംഘിച്ചുവെന്നാണ് പള്ളാത്തുരുത്തി ബോട്ട് ക്ലബിന്റെ ആരോപണം.ഈ വള്ളങ്ങളെ അയോഗ്യരാക്കണമെന്നാണ് ആവശ്യം. എന്ടിബിആര് ചെയര്മാനാണ് പരാതി നല്കിയത്.
ഹീറ്റ്സില് നടുഭാഗമാണ്( 4.20.904)മികച്ച സമയം കുറിച്ചത്. രണ്ടാമത് നിരണം 4.21.269, മൂന്നാമത് വീയപുരം 4.21. 810.മേല്പ്പാടം ചുണ്ടന്(4.22.123) നാലാം സ്ഥാനത്തെത്തി. ആദ്യ ഹീറ്റ്സില് കാരിച്ചാല് ചുണ്ടന് ഒന്നാമതെത്തി. രണ്ടാം ഹീറ്റ്സ് മത്സരത്തില് നടുവിലേ പറമ്പനും മൂന്നാം ഹീറ്റ്സില് മേല്പ്പാടം ചുണ്ടനും ഒന്നാമതെത്തി. നാലാം ഹീറ്റ്സില് പുന്നമട ബോട്ട് ക്ലബിന്റെ നടുഭാഗമാണ് ഒന്നാമതെത്തിയത്. അഞ്ചാം ഹീറ്റസില് പായിപ്പാടന് വണ് വള്ളം ഒന്നാമതെത്തി. ആറാം ഹീറ്റ്സില് വീയപുരം വിബിസി ചുണ്ടനാണ് ഒന്നാമതെത്തിയത്.
21 ചുണ്ടന് വള്ളങ്ങള് അടക്കം 75 വള്ളങ്ങളാണ് മത്സരത്തിനിറങ്ങിയത്. കഴിഞ്ഞ തവണ നിസ്സാര സമയത്തിന് ട്രോഫി നഷ്ടപ്പെട്ട വില്ലേജ് ബോട്ട് ക്ലബ് കൈനകരി ഇത്തവണ വീണ്ടും വിയപുരം ചുണ്ടനില് ആണ് തുഴയുന്നത്.
