ചേര്ത്തല: എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് ഇന്ന് 89-ാം പിറന്നാള്. കണിച്ചുകുളങ്ങരയിലെ വീട്ടില് പ്രത്യേകം തയാറാക്കിയ പന്തലില് മൂന്നു ദിവസങ്ങളിലായി നടക്കുന്ന പൂജകള് ഇന്ന് ഉച്ചയോടെ സമാപിക്കും. രാവിലെ 11.30ന് കുടുംബാംഗങ്ങളുടെയും യോഗം നേതാക്കളുടെയും പ്രവര്ത്തകരുടെയും സാന്നിദ്ധ്യത്തില് പിറന്നാള് കേക്ക് മുറിക്കും.
കൊല്ലവര്ഷം 1113ചിങ്ങം 26ന് (1937 സപ്തംബര് 10) വിശാഖം നക്ഷത്രത്തിലാണ് വെള്ളാപ്പള്ളിയുടെ ജനനം. കണിച്ചുകുളങ്ങര ദേവസ്വം പ്രസിഡന്റ് സ്ഥാനത്ത് ആറു പതിറ്റാണ്ട് പൂര്ത്തിയാക്കി വെള്ളാപ്പള്ളി ചരിത്രം കുറിച്ചിരിക്കുകയാണ്. ഇത്രയും കാലം ഒരു വ്യക്തി ഈ സ്ഥാനത്ത് തുടരുന്നത് ആദ്യമാണ്. 1996 ഫെബ്രുവരി 3ന് എസ്എന് ട്രസ്റ്റ് സെക്രട്ടറിയായ വെള്ളാപ്പള്ളി അവിടെയും ചരിത്രം കുറിച്ചു. 1996 നവംബര് 7ന് എസ്എന്ഡിപി യോഗം ജനറല് സെക്രട്ടറിയായ അദ്ദേഹം 29 വര്ഷമായി ആ സ്ഥാനത്ത് തുടരുന്നു.
ഇന്നു രാവിലെ കണിച്ചുകുളങ്ങരയിലെ വീട്ടില് നടക്കുന്ന ചടങ്ങില് വിവിധ യൂണിയന്നേതാക്കളും പ്രവര്ത്തകരും രാഷ്ട്രീയ, സാമൂഹ്യ രംഗത്തെ പ്രമുഖരും പിറന്നാള് ആശംസകളുമായി എത്തും. ആരേയും പ്രത്യേകം ക്ഷണിച്ചിട്ടില്ല. വിഭവ സമൃദ്ധമായ പിറന്നാള്സദ്യയും ഒരുക്കിയിട്ടുണ്ട്.
