കൊച്ചി: പാലിയേക്കരയില് വീണ്ടും ടോള് പിരിവ് അനുവദിക്കണമെന്ന ദേശീയപാതാ അതോറിറ്റിയുടെ ആവശ്യം ഹൈക്കോടതി തള്ളി. സെപ്തംബര് ഒന്പത് വരെ ടോള് പിരിവ് പാടില്ലെന്നാണ് കോടതി ഉത്തരവിട്ടത്.
സര്വീസ് റോഡ് നന്നാക്കിയെന്ന എന്എച്ച്എഐയുടെ ന്യായീകരണം തള്ളിയാണ് ഡിവിഷന് ബെഞ്ച് ടോള് പിരിവിന് അനുമതി നിഷേധിച്ചത്. സര്വീസ് റോഡുകള് നന്നാക്കിയെന്ന് ചൂണ്ടിക്കാട്ടി എന്എച്ച്എഐ ഏതാനും ചിത്രങ്ങളും സമര്പ്പിച്ചു.
എന്നാല് റോഡ് നിര്മ്മാണം മന്ദഗതിയിലാണ് നടക്കുന്നതെന്നും സര്വീസ് റോഡുകള് ഇതുവരെയും പൂര്ണമായും നവീകരിച്ചിട്ടില്ലെന്നും കോടതി നിയോഗിച്ച മൂന്നംഗ സമിതി ഹൈക്കോടതിയെ അറിയിച്ചു. ഗതാഗതക്കുരുക്കിന് നേരിയ ശമനം ഉള്ളത് വാഹനങ്ങള് വഴിതിരിച്ചു വിടുന്നതുകൊണ്ടാണെന്നും സമിതി വെളിപ്പെടുത്തി.
കേസ് അടുത്ത മാസം ഒമ്പതിലേക്ക് മാറ്റി. ദേശീയപാതാ അതോറിറ്റി ഉദ്യോഗസ്ഥരുടെ സാന്നിധ്യത്തില് മൂന്നംഗ സമിതി വീണ്ടും സ്ഥലത്തെത്തി പരിശോധിച്ച് ഒരു റിപ്പോര്ട്ട് കൂടി സമര്പ്പിക്കണമെന്ന് ഹൈക്കോടതി ആവശ്യപ്പെട്ടു.
