തൃശൂര്: നിയമം അനുശാസിക്കുന്ന രീതിയില് വോട്ടേഴ്സ് ലിസ്റ്റില് പേര് ചേര്ക്കുന്നത് തടയാന് ആര്ക്കും അവകാശമില്ലെന്ന് കേന്ദ്രമന്ത്രി ജോര്ജ് കുര്യന്. നിങ്ങള് താമസിക്കുന്ന സ്ഥലത്ത് നിങ്ങള്ക്ക് വോട്ട് ചെയ്യാം. വ്യത്യസ്തമായ കാരണങ്ങളാല് അവിടെ നിന്നും മാറണമെങ്കില് അതിന് കഴിയുമെന്നും വോട്ട് ചെയ്ത സ്ഥലത്ത് വര്ഷങ്ങളോളം സ്ഥിരമായി താമസിക്കണമെന്ന് നമ്മുടെ നിയമങ്ങള് പറയുന്നില്ലെന്നും അദ്ദേഹം പറഞ്ഞു. ബിജെപി സംസ്ഥാന ശില്പശാല ഉദ്ഘാടനം ചെയ്യുകയായിരുന്നു കേന്ദ്രമന്ത്രി.
മുന് സംസ്ഥാന അധ്യക്ഷന് കെ. സുരേന്ദ്രന് മഞ്ചേശ്വരത്ത് തോറ്റത് 89 വോട്ടുകള്ക്കാണ്. കേരളം കണ്ടില്ലാത്ത, കര്ണാടകയില് നിന്ന് വന്ന ആളുകള് പോലും അദ്ദേഹത്തിന് എതിരായി വോട്ട് ചെയ്തു. നമ്മള് അതിനെതിരെ പരാതി കൊടുത്തെങ്കിലും കേസ് വിജയത്തിന്റെ തൊട്ടരികില് നില്ക്കുമ്പോള് അവിടെ വിജയിച്ച എംഎല്എ മരണപ്പെട്ടു. തെരഞ്ഞെടുപ്പില് പരാതി കൊടുക്കാന് നിശ്ചിത സമയപരിധിയും അവസരവുമുണ്ട്. അത് ഉപയോഗിക്കാതെയാണ് കോണ്ഗ്രസും സിപിഎമ്മും നുണപ്രചാരണം നടത്തുന്നത്.
ബിജെപിയുടെ ഒരു പ്രവര്ത്തകനും കള്ളവോട്ട് ചേര്ക്കുകയോ കള്ളവോട്ട് ചെയ്യുകയോ ചെയ്തിട്ടില്ല. എവിടെയെങ്കിലും ഇരട്ട വോട്ട് ഉണ്ടെങ്കില് പോലും ബിജെപി പ്രവര്ത്തകര് അത് ചെയ്തിട്ടില്ല. 18 വയസ് പൂര്ത്തിയായവരെ വോട്ട് ചേര്ക്കാനുള്ള അവകാശം നമ്മള് വിനിയോഗിക്കണമെന്നും കേന്ദ്രമന്ത്രി നിര്ദേശിച്ചു. സംസ്ഥാന അധ്യക്ഷന് രാജീവ് ചന്ദ്രശേഖര് അദ്ധ്യക്ഷനായി. യോഗത്തില് പ്രഭാരി പ്രകാശ് ജാവദേക്കര്, സഹപ്രഭാരി അപരാജിത സാരംഗി, മുതിര്ന്ന നേതാക്കളായ പി.കെ. കൃഷ്ണദാസ്, എ.പി. അബ്ദുള്ളക്കുട്ടി, എം.ടി. രമേശ്, ശോഭാ സുരേന്ദ്രന്, അഡ്വ. എസ്. സുരേഷ്, അനൂപ് ആന്റണി, അഡ്വ. കെ.കെ. അനീഷ്കുമാര് എന്നിവര് പ്രസംഗിച്ചു. ആര്എസ്എസ് ഉത്തര കേരളം പ്രാന്ത കാര്യവാഹ് പി.എന്. ഈശ്വരന് ശില്പശാലയില് ക്ലാസെടുത്തു.
ബിജെപി സംസ്ഥാന വൈസ് പ്രസിഡന്റുമാരായ അഡ്വ. ബി. ഗോപാലകൃഷ്ണന്, അഡ്വ. ഷോണ് ജോര്ജ്, ഉണ്ണികൃഷ്ണന് മാഷ്, എ.എന്. രാധാകൃഷ്ണന്, സിറ്റി ജില്ലാ പ്രസിഡന്റ് ജസ്റ്റിന് ജേക്കബ്, ജില്ലാ ജനറല് സെക്രട്ടറിമാരായ പി.കെ. ബാബു, അഡ്വ. കെ.ആര്. ഹരി, സുധീഷ് മേനോത്ത്പറമ്പില്, ജില്ലാ ട്രഷറര് വിജയന് മേപ്രത് എന്നിവര് നേതൃത്വം നല്കി.
