ആലപ്പുഴ: ജോലി വാഗ്ദാനം ചെയ്ത് തട്ടിപ്പ് നടത്തിയ യുവതി പൊലീസ് പിടിയില്. മാരാരിക്കുളം എസ് എന് പുരം സ്വദേശി ദിവ്യാ ചന്ദ്രന് (44) ആണ് പിടിയിലായത്. ചോറ്റാനിക്കര ഭാഗത്തു നിന്ന് പൂച്ചാക്കല് പൊലീസാണ് അറസ്റ്റ് ചെയ്തത് .
മന്ത്രിയുടെ പേഴ്സണല് സ്റ്റാഫ് ആണെന്ന് വിശ്വസിപ്പിച്ചാണ് ദിവ്യ പണം തട്ടിയത്.പാണാവള്ളി സ്വദേശി റിട്ടയേര്ഡ് ഹെല്ത്ത് ഇന്സ്പെക്ടറില് നിന്നും 50 ലക്ഷം രൂപയാണ് തട്ടിച്ചത്. കലാമിറ്റി ഫണ്ട്, പകര്ച്ച വ്യാധി നിവാരണ ഫണ്ട് എന്നിവയിലേക്ക് പൊതുജനങ്ങളില് നിന്നും ഫണ്ട് സ്വീകരിക്കുന്നുണ്ടെന്നും നല്ല പലിശ കിട്ടുമെന്നും പറഞ്ഞ് വിശ്വസിപ്പിച്ചാണ് തട്ടിപ്പ് നടത്തിയത്.
പരാതിക്കാരന്റെ മകന് കോട്ടയം മെഡിക്കല് കോളേജില് കാത്ത് ലാബ് ടെക്നീഷ്യനായി ജോലി വാങ്ങി നല്കാമെന്ന് പറഞ്ഞും വിശ്വസിപ്പിച്ചു.പണം കൈപ്പറ്റിയ ശേഷം ഒളിവിലായിരുന്നു ദിവ്യ. ഇവര് മറ്റ് സ്റ്റേഷനുകളിലും സമാന രീതിയിലുള്ള കുറ്റകൃത്യം ചെയ്തിട്ടുണ്ടെന്നാണ് വിവരമെന്ന് പൊലീസ് അറിയിച്ചു.
