കോട്ടയം: തെരഞ്ഞെടുപ്പ് അടുത്തതോടെ പിണറായി സര്ക്കാരിന്റെ അപദാനങ്ങള് വാഴ്ത്താന് സന്നദ്ധരായ വ്ളോഗര്മാരെയും സോഷ്യല് മീഡിയ ഇന്ഫ്ളുവന്സര്മാരെയും തേടി സര്ക്കാര് രംഗത്തിറങ്ങി.
താല്പ്പര്യമുള്ളവരില് നിന്ന് ഇന്ഫര്മേഷന് പബ്ലിക് റിലേഷന്സ് വകുപ്പിന്റെ പാനലില് അംഗമാകാന് അപേക്ഷ ക്ഷണിച്ചു. സര്ക്കാര് സംവിധാനമായ പബ്ലിക് റിലേഷന്സ് വകുപ്പ് ഇക്കാര്യത്തില് പരാജയമാണെന്ന വിലയിരുത്തലിലാണ് ഈ നീക്കം.
മൂന്നു ലക്ഷമെങ്കിലും ഫോളോവര്മാരുള്ള വ്ളോഗര്മാര്ക്കും യൂട്യൂബ്, ഇന്സ്റ്റാഗ്രാം, ഫേസ് ബുക്ക് എന്നിവയില് നല്കിയിട്ടുളള വീഡിയോ കണ്ടന്റുകള്ക്ക് മിനിമം 10 ലക്ഷം റീച്ച് ലഭിക്കുന്ന സോഷ്യല് മീഡിയ ഇന്ഫ്ളുവന്സര്മാര്ക്കും അപേക്ഷിക്കാമെന്നാണ് അറിയിപ്പില് പറയുന്നത്.
വിഷയാധിഷ്ഠിത വ്ളോഗുകള് തയ്യാറാക്കുന്നതിനുള്ള സമ്മതപത്രം, ഫോളോവേഴ്സിന്റെ എണ്ണം, വ്ളോഗിന്റെ സ്വഭാവം തെളിയിക്കുന്ന ലിങ്കുകള്, വ്യക്തിവിവരങ്ങള് എന്നിവ സഹിതമാണ് അപേക്ഷിക്കേണ്ടത് . പാനലില് ഉള്പ്പെടുന്നതിന് പ്രായപരിധി ഇല്ല. സ്വന്തം സംവിധാനങ്ങള് ഉപയോഗപ്പെടുത്തി കണ്ടന്റുകള് സ്വയം ക്രിയേറ്റ് ചെയ്യുന്നവരും വകുപ്പിന്റെ ആവശ്യപ്രകാരം വ്ളോഗുകള് തയ്യാറാക്കുന്നതിനു സന്നദ്ധതയുള്ളവരുമാകണം അപേക്ഷകരെന്ന് പ്രത്യേകം പറയുന്നുണ്ട്.
