തിരുവനന്തപുരം: സംസ്ഥാനത്ത് കഴിഞ്ഞ ഒരു മാസത്തിനിടെ വിവിധ ദിവസങ്ങളിലായി നടത്തിയ പരിശോധനകളില് 17,000 ലിറ്റര് വ്യാജ വെളിച്ചെണ്ണ പിടിച്ചെടുത്തതായി ഭക്ഷ്യസുരക്ഷ വകുപ്പ് . 1014 ഇടങ്ങളില് പരിശോധന നടത്തി. 469 സാമ്പിളുകള് ശേഖരിച്ച് നടപടികള് സ്വീകരിച്ചു. 25 സ്ഥാപനങ്ങള്ക്ക് നോട്ടീസ് നല്കി. കേരസൂര്യ, കേര ഹരിതം, കുട്ടനാടന് കേര തുടങ്ങിയ പേരിലുള്ള വെളിച്ചെണ്ണ നിര്മ്മാതാക്കള്ക്കെതിരെ നിയമ നടപടി സ്വീകരിച്ചു. കഴിഞ്ഞ ഏപ്രില് മാസം മുതല് സംസ്ഥാനത്ത് 21,030 ഭക്ഷ്യ സുരക്ഷാ പരിശോധനകളാണ് നടത്തിയത്. 331 സ്ഥാപനങ്ങള്ക്കെതിരെ കേസ് ഫയല് ചെയ്തു. 1613 സ്ഥാപനങ്ങളില് നിന്നും 63 ലക്ഷം രൂപയുടെ പിഴ ഈടാക്കി.
ഓണക്കാലത്ത് സംസ്ഥാനത്ത് നിര്മ്മിക്കുന്നതും ഇറക്കുമതി ചെയ്യുന്നതും വിതരണം ചെയ്യുന്നതും വില്ക്കുന്നതുമായ ഭക്ഷ്യവസ്തുക്കളുടെ ഗുണനിലവാരം ഉറപ്പുവരുത്തുന്നതിനായി അടുത്ത ആഴ്ച മുതല് എല്ലാ ജില്ലകളിലും പ്രത്യേക സ്ക്വാഡ് രൂപീകരിച്ച് പരിശോധനകള് കര്ശനമാക്കുമെന്ന് ഭക്ഷ്യസുരക്ഷ വകുപ്പ്
അറിയിച്ചു. രാത്രികാല പരിശോധനയും ഉണ്ടാകും. തട്ടുകടകള് കൂടി കേന്ദ്രീകരിച്ച് കര്ശന പരിശോധന ഉറപ്പാക്കാനും നിര്ദേശം നല്കി.
